IND vs AUS 2nd ODI Pitch and Weather Prediction : भारत आणि ऑस्ट्रेलिया यांच्यातील तीन सामन्यांच्या वनडे मालिकेतील दुसरा सामना उद्या, २३ ऑक्टोबर २०२५ रोजी ॲडलेड ओव्हलवर रंगणार आहे. पहिल्या सामन्यात ऑस्ट्रेलियाने भारताला ७ गडी राखून पराभव पत्करला असल्याने भारतीय संघ ०-१ ने पिछाडीवर आहे. आता दुसऱ्या सामन्यात विजय मिळवून मालिका १-१ ने बरोबरीत आणण्याचा भारताचा प्रयत्न असेल. दरम्यान, पहिल्या सामन्यात पावसाने खोडा घातला होता, पण ॲडलेडमधील हवामान आणि खेळपट्टी कशी असेल, याची माहिती जाणून घ्या.

ॲडलेड ओव्हलची खेळपट्टी: फलंदाज आणि फिरकी गोलंदाजांना उपयुक्त

ॲडलेड ओव्हलची खेळपट्टी फलंदाज आणि गोलंदाज दोघांसाठीही संतुलित मानली जाते. यापूर्वीच्या सामन्यांमध्ये येथे फलंदाजांनी धावांचा पाऊस पाडल्याचे पाहायला मिळाले आहे. त्यामुळे उद्याही मोठ्या धावसंख्येची शक्यता आहे. याशिवाय, या खेळपट्टीवर फिरकी गोलंदाजांना चांगली उसळी आणि फिरकी मिळते. त्यामुळे भारतीय संघात कुलदीप यादवचा समावेश होण्याची शक्यता आहे, ज्यामुळे गोलंदाजीला बळ मिळू शकते.

हवामानाचा अंदाज: पावसाचा अडथळा नाही

ॲक्यूवेदरच्या अहवालानुसार, २३ ऑक्टोबरला ॲडलेडमध्ये स्वच्छ हवामान राहील आणि पावसाची शक्यता जवळपास नाही. तापमान ११ ते २० डिग्री सेल्सिअस दरम्यान असेल, जे खेळासाठी अनुकूल आहे. यामुळे क्रिकेटप्रेमींना ५०-५० षटकांचा पूर्ण सामना पाहण्याची संधी मिळेल. पहिल्या पर्थ वनडेत पावसामुळे चार वेळा खेळ थांबला होता, ज्याचा भारतीय संघाला फटका बसला. पण ॲडलेडमध्ये असा अडथळा येण्याची शक्यता कमी आहे.

हेही वाचा – SA vs PAK : रबाडाची तुफानी फलंदाजी! ११व्या क्रमांकावर ऐतिहासिक अर्धशतक मोडला ११९ वर्षांचा विक्रम

भारताची ॲडलेडमधील कामगिरी –

भारतीय संघाने ॲडलेड ओव्हलवर वनडे क्रिकेटमध्ये दमदार कामगिरी केली आहे. भारताने येथे १५ वनडे सामने खेळले असून, त्यापैकी ९ जिंकले, ५ गमावले, तर १ सामना अनिर्णित राहिला. विशेषतः २०१५च्या विश्वचषकात भारताने याच मैदानावर पाकिस्तानविरुद्ध ३०० धावांचा डोंगर उभारत ७६ धावांनी विजय मिळवला होता. या सामन्यात पाकिस्तानचा डाव २२४ धावांत आटोपला होता. आता उद्याच्या सामन्यात भारतीय संघाला आपल्या फलंदाजी आणि गोलंदाजीच्या जोरावर मालिकेत पुनरागमन करण्याची संधी आहे. क्रिकेटप्रेमींना या रोमांचक लढतीकडे सर्वांचे लक्ष लागले आहे.