Ind vs Aus 3rd ODI : टीम इंडियासमोर व्हाईट वॉश टाळण्याचे आव्हान, ऑस्ट्रेलियाविरूध्दचा अखेरचा सामना आज….
Ind vs Aus 3rd ODI :- पहिल्या दोन लढती गमावलेला भारतीय महिला संघ बुधवारी ऑस्ट्रेलियाविरुद्धचा तिसऱ्या आणि अंतिम एकदिवसीय लढतीमध्ये विजय मिळविताना व्हाईटवॉश टाळण्याचा प्रयत्न करेल. पुढील वर्षी होणाऱ्या एकदिवसीय विश्वचषक स्पर्धेत सहभागी होण्यापूर्वी किमान १ विजय आपल्या नावावर असावा, यासाठी या लढतीत भारतीय महिला संघाला विजय मिळवावाच लागणार आहे.
सात वेळा विश्वविजेत्या ऑस्ट्रेलियाने तीन सामन्यांच्या मालिकेत पूर्णपणे वर्चस्व राखले आहे. त्यांनी फलंदाजी, गोलंदाजी आणि क्षेत्ररक्षण या तिन्ही क्षेत्रात असलेला भारतीय संघाचा कमकुवतपणा ऑस्ट्रेलिया संघाने दाखवून दिला. पहिल्या लढतीत ऑस्ट्रेलियाने भारताला ५ गडी राखून पराभूत केले होते. दुसऱ्या लढतीत ऑस्ट्रेलियाने ३७२ धावांचे विशाल लक्ष्य विजयासाठी दिले होते. या लक्ष्याचा पाठलाग करताना भारतीय संघाचा डाव २४९ धावांमध्ये संपुष्टात झाला. भारताला दुसऱ्या लढतीत तब्बल १२२ धावांनी पराभव स्वीकारावा लागला होता.
रिचा घोषने दुसऱ्या एकदिवसीय सामन्यात 54 धावा केल्या, जी सध्याच्या मालिकेतील भारतीय फलंदाजाची सर्वोच्च धावसंख्या आहे. दुसरीकडे, ऑस्ट्रेलियाच्या फलंदाजांनी आतापर्यंत दोन शतके आणि दोन अर्धशतके केली आहेत. यावरून भारतीय फलंदाज धावा काढण्यासाठी किती धडपडत आहेत, हे लक्षात येते. पहिल्या वनडेत केवळ चार भारतीय फलंदाजांना दुहेरी आकडा गाठता आला होता. भारतीय गोलंदाजांची कामगिरीही आतापर्यंत चांगली झालेली नाही. त्याचे चेंडूवर नियंत्रण नाही. क्षेत्ररक्षकांनी झेल सोडत त्यांच्या अडचणी वाढवल्या.
ऑस्ट्रेलियाने आतापर्यंत तिन्ही विभागात चांगली कामगिरी केली आहे. स्टार फलंदाज ॲलिसा हिलीच्या अनुपस्थितीत ऑस्ट्रेलियाने सलामीवीर जॉर्जिया वोलला पदार्पण दिले. या २१ वर्षीय फलंदाजाने पहिल्या सामन्यात नाबाद 46 धावा आणि दुसऱ्या सामन्यात 101 धावा करत निवडकर्त्यांचा निर्णय योग्य असल्याचे सिद्ध केले.
कर्णधार-उपकर्णधारांचे अपयश…
कर्णधार हरमनप्रीत कौर आणि उपकर्णधार स्मृती मानधना या दोन स्टार फलंदाजांनी भारताची सर्वाधिक निराशा केली आहे. मंधानाने ऑक्टोबरमध्ये न्यूझीलंडविरुद्ध शतक झळकावले होते, मात्र ऑस्ट्रेलियाविरुद्धच्या पहिल्या दोन सामन्यांमध्ये तिला केवळ 17 धावाच करता आल्या होत्या. हरमनप्रीतला तिच्या चांगल्या सुरुवातीचे मोठ्या खेळीत रूपांतर करण्यात अपयश आले आहे. त्याने दोन सामन्यांत 57 धावा केल्या आहेत. टी-२० विश्वकरंडक स्पर्धेतून भारतीय महिला संघ साखळी फेरीतून बाद झाला होता. तेव्हा पासून हरमनप्रीतची खराब कामगिरी सुरूच आहे.
संघ खालीलप्रमाणे …
भारत : हरमनप्रीत कौर (कर्णधार), स्मृती मानधना (उपकर्णधार), प्रिया पुनिया, जेमिमाह रॉड्रिग्स, हरलीन देओल, उमा छेत्री, रिचा घोष (विकेटकीपर), तेजल हसबनीस, दीप्ती शर्मा, मिन्नू मणी, प्रिया मिश्रा, राधा यादव, तितस साधू, अरुंधती रेड्डी, रेणुका सिंग ठाकूर आणि सायमा ठाकूर.
ऑस्ट्रेलिया : ताहलिया मॅकग्रा (कर्णधार), ऍशले गार्डनर (उप-कर्णधार), डार्सी ब्राउन, किम गर्थ, अलाना किंग, फोबी लिचफिल्ड, सोफी मोलिनक्स, बेथ मूनी, एलिस पेरी, मेगन शुट, ॲनाबेल सदरलँड, जॉर्जिया वॉल, जॉर्जिया वेरहम.
