IND vs AFG : भारत आणि अफगाणिस्तान यांच्यात (IND vs AFG) खेळल्या गेलेल्या एकदिवसीय (वनडे) मालिकेत भारतीय संघाने आपली विजयाची घोडदौड कायम ठेवत अफगाणिस्तानला ३-० असे नमवून मालिकेत निर्भेळ यश (व्हाईट वॉश) मिळवले आहे.

कसोटी सामन्यातील शानदार विजयानंतर भारताने वनडे मालिकेतही आपले वर्चस्व सिद्ध केले. मालिकेतील (IND vs AFG) तिसऱ्या आणि अंतिम सामन्यात भारताने अफगाणिस्तानचा ९ गडी राखून पराभव केला.

या अंतिम सामन्यात अफगाणिस्तानच्या संघाने भारतासमोर विजयासाठी २१९ धावांचे आव्हान ठेवले होते. या आव्हानाचा पाठलाग करताना भारतीय फलंदाजांनी उत्कृष्ट कामगिरी केली. भारताने अवघा १ गडी गमावून, अवघ्या २२.४ षटकांत हे लक्ष्य सहज गाठले आणि अफगाणिस्तानला पराभवाची धूळ चारली.

रोहित-यशस्वीची वादळी भागीदारी

विजयी धावांचा पाठलाग करण्यासाठी मैदानात उतरलेल्या रोहित शर्मा आणि यशस्वी जयस्वाल या सलामीवीर जोडीने सुरुवातीला सावध पण नंतर अत्यंत आक्रमक पवित्रा घेतला. या दोघांनी पहिल्या विकेटसाठी तब्बल १७० धावांची भक्कम भागीदारी करून भारताच्या विजयाचा पाया रचला. माजी कर्णधार रोहित शर्माने ६९ चेंडूंमध्ये ९ चौकार आणि ३ षटकारांच्या मदतीने ७९ धावांची शानदार खेळी केली, ज्यामुळे सामना पूर्णपणे भारताच्या बाजूने झुकला.

दुसऱ्या बाजूने युवा फलंदाज यशस्वी जयस्वालने मागील सामन्यातील अपयशाची पूर्ण भरपाई केली. मागील सामन्यात अवघ्या ४ धावांवर बाद झालेल्या जयस्वालने या सामन्यात खणखणीत पुनरागमन केले. त्याने अवघ्या ८३ चेंडूंमध्ये षटकार ठोकून आपले शानदार शतक पूर्ण केले आणि संघाला विजय मिळवून देण्यात मोलाची भूमिका बजावली.

प्रसिद्ध कृष्णाचे ५ बळी

तत्पूर्वी, भारताने नाणेफेक जिंकून प्रथम गोलंदाजी करण्याचा निर्णय घेतला होता, जो गोलंदाजांनी योग्य ठरवला. भारताकडून वेगवान गोलंदाज प्रसिद्ध कृष्णाने अत्यंत भेदक मारा केला. त्याने ८.२ षटकांत २ निर्धाव (मेडन) षटके टाकत अवघ्या २३ धावा दिल्या आणि अफगाणिस्तानचे ५ फलंदाज तंबूत धाडले. त्याला गुरनूर ब्रार, प्रिन्स यादव आणि हर्ष दुबे यांनी प्रत्येकी १ बळी घेत चांगली साथ दिली. तसेच, अफगाणिस्तानचे दोन फलंदाज धावचीत (रनआऊट) झाले.

अफगाणिस्तानच्या (IND vs AFG) बाजूने कर्णधार हशमतुल्लाह शाहिदी आणि अझमतुल्लाह ओमरझाई यांचा अपवाद वगळता इतर कोणत्याही फलंदाजाला भारतीय गोलंदाजीसमोर तग धरता आला नाही. हशमतुल्लाहने १३१ चेंडूंचा सामना करत १३ चौकार आणि १ षटकारासह १०२ धावांची शतकी खेळी केली, तर अझमतुल्लाह ओमरझाईने ५६ चेंडूंत ५० धावांचे योगदान दिले. मात्र, इतर फलंदाजांच्या अपयशामुळे अफगाणिस्तानचा डाव २१८ धावांवर आटोपला.