Cricket News : श्रीलंकेत सुरू असलेल्या त्रिकोणी मालिकेत (ट्राय सिरीज) तिलक वर्माच्या नेतृत्वाखालील ‘इंडिया ए’ संघाने (Cricket News) अफगाणिस्तानचा १०१ धावांच्या मोठ्या फरकाने पराभव करत दिमाखात अंतिम फेरीत जागा मिळवली आहे.

या महत्त्वपूर्ण सामन्यात प्रथम फलंदाजी करताना ‘इंडिया ए’ संघाने ९ बाद ३१९ धावांचा डोंगर उभारला होता, ज्याचा पाठलाग करताना अफगाणिस्तानचा संघ अवघ्या २१८ धावांवर गारद झाला.

या शानदार आणि सोप्या विजयाचा आनंद भारतीय गोटात साजरा होत असतानाच, तेलंगणा क्रिकेट असोसिएशनने कर्णधार तिलक वर्माला एक मोठा झटका दिला आहे. विशेष म्हणजे या प्रकरणात (Cricket News) तिलक वर्मा एकटा नसून, त्याच्यासोबत भारताचे इतर दिग्गज क्रिकेटपटू अंबाती रायडू आणि मोहम्मद सिराज यांचाही समावेश आहे.

तेलंगणा क्रिकेट असोसिएशनने (TCA) दाक्षिणात्य चित्रपटसृष्टीतील प्रसिद्ध अभिनेते विजय देवरकोंडा आणि व्यंकटेश यांच्यासह क्रिकेटपटू अंबाती रायडू, तिलक वर्मा आणि मोहम्मद सिराज यांना कायदेशीर नोटीस बजावली आहे.

हैदराबाद क्रिकेट असोसिएशन (HCA) हे भारतीय क्रिकेट नियामक मंडळाच्या (BCCI) कोणत्याही पूर्वपरवानगीशिवाय विविध कॉर्पोरेट कंपन्यांसोबत मिळून व्यावसायिक उपक्रम चालवत असल्याचा गंभीर आरोप या नोटिसीमध्ये करण्यात आला आहे.

या कायदेशीर नोटिसीनुसार, हैदराबाद क्रिकेट असोसिएशन सध्या ज्या टी२० लीगचे आयोजन करत आहे. त्यासाठी त्यांनी बीसीसीआयची कोणतीही मंजुरी घेतलेली नाही. त्यामुळे बीसीसीआयच्या अधिकृत परवानगीशिवाय अशा लीगचे आयोजन करणे आणि त्याचा प्रचार-प्रसार करणे हे थेट नियमांचे उल्लंघन असून ते एका गुन्ह्याच्या श्रेणीत येते, असे टीसीएने स्पष्ट केले आहे.

अभिनेता विजय देवरकोंडा या लीगचा ब्रँड अ‍ॅम्बेसेडर म्हणून काम पाहत आहे, तर उल्लेख केलेल्या क्रिकेटपटूंवर या लीगचे (Cricket News) प्रमोशन केल्याचा थेट आरोप आहे. दरम्यान, या संपूर्ण प्रकरणावर अद्याप हैदराबाद क्रिकेट असोसिएशन किंवा बीसीसीआय यांच्याकडून कोणतीही अधिकृत प्रतिक्रिया किंवा स्पष्टीकरण समोर आलेले नाही.