रांजणगाव गणपती : रांजणगाव गणपतीसह परिसरातील गावांमध्ये बिबट्यांचा वावर वाढत असल्याने शेतकरी आणि ग्रामस्थांमध्ये भीतीचे वातावरण निर्माण झाले आहे. बिबट्यांकडून पाळीव जनावरांवर हल्ले होण्याच्या घटना घडत असल्याने शेतकऱ्यांच्या पशुधनाला धोका निर्माण झाला आहे. त्यामुळे वनविभागाने तातडीने संवेदनशील ठिकाणी पिंजरे लावून बिबट्यांचा बंदोबस्त करावा, अशी मागणी युवा सेना जिल्हाप्रमुख बापूसाहेब शिंदे यांनी केली आहे.

शिरूर तालुक्यातील अनेक गावांमध्ये बिबट्यांचा मुक्त संचार सुरू असून, शेतात काम करण्यासाठी जाणाऱ्या शेतकऱ्यांना जीव मुठीत धरून काम करावे लागत आहे. रात्रीच्या वेळी शेतात पाणी भरणे, जनावरांची देखभाल करणे, शेतीची कामे करणेही धोकादायक बनले आहे. महिला, लहान मुले आणि ज्येष्ठ नागरिकांच्या सुरक्षिततेचा प्रश्नही गंभीर बनला आहे.

बिबट्यांच्या वावराबाबत वनविभागाला वारंवार माहिती देऊनही प्रभावी उपाययोजना होत नसल्याची शेतकऱ्यांची तक्रार आहे. केवळ पंचनामे आणि घटनास्थळी भेटी देऊन प्रश्न सुटणार नाही. ज्या भागात बिबट्यांचा वावर आढळतो, त्या ठिकाणी तातडीने पिंजरे लावणे, कॅमेरे बसवणे, नियमित गस्त घालणे, ग्रामस्थांना सतर्कतेबाबत मार्गदर्शन करणे आवश्यक आहे.

वनविभागाने एखादी मोठी दुर्घटना घडण्याची वाट पाहू नये. शेतकऱ्यांच्या जीविताचे आणि पशुधनाचे संरक्षण करणे ही प्रशासनाची जबाबदारी आहे. बिबट्यांच्या बंदोबस्तासाठी ठोस कृती आराखडा तयार करून त्याची तातडीने अंमलबजावणी करावी. बिबट्यांच्या हल्ल्यात पशुधनाचे नुकसान झालेल्या शेतकऱ्यांना त्वरित नुकसानभरपाई द्यावी, अशी मागणी बापूसाहेब शिंदे यांनी केली आहे.

वनविभागाने शेतकऱ्यांच्या तक्रारींकडे गांभीर्याने लक्ष देऊन रांजणगाव परिसरातील बिबट्यांच्या वाढत्या दहशतीवर तातडीने उपाययोजना कराव्यात; अन्यथा शेतकऱ्यांच्या सुरक्षिततेचा प्रश्न ऐरणीवर येईल, असा इशाराही त्यांनी दिला आहे.