छत्रपती संभाजीनगर : शिवसेना खासदार संदीपान भुमरे याचा ड्रायव्हर जावेद रसूल शेख यांना आयकर विभागाने नोटीस बजावल्याने छत्रपती संभाजीनगरमध्ये राजकीय खळबळ उडाली आहे. हैदराबादच्या सालारजंग कुटुंबाच्या वंशजांनी जावेद शेख यांना 150 कोटी रुपये किमतीच्या 3 एकर जमिनीचा हिबानामा (भेटपत्र) दिल्याच्या प्रकरणाची चौकशी तीव्र झाली आहे.

आयकर विभागाने 8 जुलै 2025 रोजी जावेद शेख यांना चौकशीसाठी बोलावले होते, परंतु त्यांनी हजर राहण्यासाठी आणखी वेळ मागितल्याची माहिती समोर आली आहे. या प्रकरणाने राजकीय वर्तुळात चर्चेला उधाण आले आहे.

काय आहे प्रकरण ?

छत्रपती संभाजीनगरमधील जालना रोडवरील दावूदपुरा येथील 3 एकर जमीन जी सध्या रेडी रेकनर दरानुसार 150 कोटी रुपये किमतीची आहे. सालारजंग कुटुंबाच्या वंशजांनी जावेद शेख यांना हिबानामा (भेटपत्र) म्हणून दिल्याचा दावा आहे. ही जमीन एकूण 12 एकर मालमत्तेचा भाग असून, ती मीर मझहर अली खान आणि त्यांच्या सहा नातेवाइकांनी हिबानाम्यामार्फत हस्तांतरित केल्याचे सांगितले जाते. या व्यवहारावर प्रश्नचिन्ह उपस्थित झाले असून, आर्थिक गुन्हे शाखा (EOW) आणि आयकर विभाग दोन्ही यंत्रणा स्वतंत्रपणे चौकशी करत आहेत.

आयकर विभागाची नोटीस

जावेद शेख यांना आयकर विभागाने 8 जुलै 2025 रोजी चौकशीसाठी बोलावले होते. त्यांना त्यांच्या उत्पन्नाचे स्रोत, आयकर विवरणपत्रे आणि हिबानाम्याच्या वैधतेबाबत कागदपत्रे सादर करण्यास सांगितले होते. मात्र, जावेद शेख चौकशीसाठी हजर राहिले नसून, त्यांनी आणखी वेळ मागितल्याची माहिती आहे.

परभणी येथील वकील मुजाहिद इक्बाल खान यांनी दाखल केलेल्या तक्रारीनंतर आर्थिक गुन्हे शाखेने जावेद शेख यांची चौकशी सुरू केली आहे. तक्रारदाराने असा दावा केला आहे की, सालारजंग कुटुंब आणि जावेद शेख यांच्यात कोणतेही रक्ताचे नाते नसताना हिबानामा वैध कसा ठरू शकतो? तसेच, हा व्यवहार संशयास्पद असून, त्यात मनी लाँड्रिंगची शक्यता आहे.