पुणे – शरद मोहोळचा खून करण्यापूर्वी मुळशीतील हडशी गावात मुख्य आरोपी मुन्ना पोळेकर आणि साथीदारांनी गोळीबाराचा सराव केला होता. मध्यरात्री झाडाच्या बुंध्यावर पोळेकर आणि साथीदारांनी पिसतूलातून गोळ्या झाडून सराव केला.

याप्रकरणी बंडगार्डन पोलीस ठाण्यात दोन स्वतंत्र गुन्हे दाखल करण्यात आले असून, पौड पोलीस ठाण्यात तपासासाठी सोपविण्यात आला आहे. साहिल उर्फ मुन्ना संतोष पोळेकर ( २०, रा. सुतारदरा, कोथरुड), नामदेव महिपती कानगुडे ( ३४, रा. भूगाव आणि कोथरुड),

सतीश संजय शेडगे ( २८, रा. स्वप्नशिल्प अपार्टमेंट, माथवाडी फाटा, भूगाव), आदित्य विजय गोळे (रा. गोळे आळी. पिरंगुट), नितीन अनंता खैरे (रा. नंदनवन सोसायटी, कोथरुड) अशी गुन्हा दाखल करण्यात आलेल्यांची नावे आहेत.

मोहोळच्या खुनाच्या कटात सामील होेण्यास नकार दिल्याने पोळेकर आणि कानगुडे यांनी डिसेंबरमध्ये भूगाव परिसरात अजय सुतार याच्यावर गोळीबार केला होता. खुनाचा प्रयत्न केल्याप्रकरणी पोळेकर आणि कानगुडे यांच्याविरुद्ध पौड पोलीस ठाण्यात गुन्हा दाखल करण्यात आला. पोळेकर आणि साथीदारांनी जुलैमध्ये हडशी गावातील बोडकेवाडी येथे गोळीबाराचा सराव केल्याचे तपासात उघडकीस आले आहे.