Imran Khan :  पाकिस्तानचे माजी पंतप्रधान आणि पाकिस्तान तेहरीक-ए-इन्साफ (PTI)चे संस्थापक इमरान खान यांच्या प्रकृतीबाबत पुन्हा एकदा गंभीर चर्चा सुरू झाली आहे. तुरुंगात इमरान खान यांचा मृत्यू झाल्याची शक्यता असल्याचा दावा पाकिस्तानी पत्रकार वजाहत सईद खान यांनी केल्याने पाकिस्तानच्या राजकीय वर्तुळात खळबळ उडाली आहे. मात्र, इमरान खान यांच्या मृत्यूची अधिकृतपणे कोणतीही पुष्टी झालेली नाही.

वजाहत सईद खान यांनी त्यांच्या यूट्यूब चॅनेलवर केलेल्या दाव्यानुसार, पाकिस्तानच्या तीन वरिष्ठ लष्करी सूत्रांनी इमरान खान जिवंत नसण्याची शक्यता व्यक्त केली आहे. मात्र, या सूत्रांनी स्वतः इमरान खान यांना मृत पाहिलेले नाही, असेही पत्रकाराने स्पष्ट केले आहे. त्यामुळे हा दावा प्रत्यक्ष पुष्टीवर आधारित नसून सूत्रांकडून मिळालेल्या माहितीवर आधारित आहे.

कुटुंबीय आणि PTIला भेटीची परवानगी नाही?

इमरान खान यांच्या प्रकृतीबाबत चिंता वाढण्यामागे त्यांच्या कुटुंबीय, पक्षाचे नेते, वकील आणि खासगी डॉक्टरांना त्यांची भेट घेण्यास परवानगी मिळण्याबाबत सुरू असलेला वादही महत्त्वाचा ठरत आहे.

PTIकडून यापूर्वीही इमरान खान यांना तुरुंगात एकटं पाडल्याचा आणि त्यांच्या उपचाराबाबत योग्य व्यवस्था केली जात नसल्याचा आरोप करण्यात आला आहे. जूनमध्ये पक्षाने इमरान खान यांना रुग्णालयात दाखल करावे, नियमित भेटीची परवानगी द्यावी आणि खासगी डॉक्टरांकडून त्यांची वैद्यकीय तपासणी करून घ्यावी, अशी मागणी केली होती.

यापूर्वी मे महिन्यात इमरान खान यांच्या बहिणींना तसेच खैबर पख्तूनख्वाचे मुख्यमंत्री सोहेल अफरीदी यांना अदियाला तुरुंगात जाण्यापासून रोखण्यात आल्याचा दावा PTIने केला होता. या घटनेनंतर पक्षाकडून आंदोलनही करण्यात आले होते.

मृत्यूच्या अफवेदरम्यान PTIचा शक्तिप्रदर्शनाचा इशारा

इमरान खान यांच्या स्थितीबाबतच्या चर्चेचा परिणाम आता राजकीय वातावरणावरही होत आहे. PTIचे नेते आणि खैबर पख्तूनख्वाचे मुख्यमंत्री सोहेल अफरीदी यांनी पक्षाचे २० लाखांहून अधिक समर्थक रस्त्यावर उतरण्यास तयार असल्याचा दावा केला आहे.

पक्षाने २७ सप्टेंबर रोजी इस्लामाबादच्या दिशेने लॉन्ग मार्च काढण्याची घोषणा केल्याचेही सांगितले जात आहे. त्यामुळे इमरान खान यांच्या प्रकृतीबाबतच्या चर्चेमुळे पाकिस्तानातील राजकीय संघर्ष आणखी तीव्र होण्याची शक्यता व्यक्त केली जात आहे.

ऑगस्ट २०२३ पासून तुरुंगात

इमरान खान ऑगस्ट २०२३ पासून तुरुंगात आहेत. विविध प्रकरणांमध्ये त्यांना शिक्षा सुनावण्यात आली असून ते अदियाला तुरुंगात आहेत. त्यांच्या अटकेनंतर पाकिस्तानचे लष्करी नेतृत्व आणि इमरान खान यांच्यातील संघर्ष हा देशाच्या राजकारणातील प्रमुख मुद्द्यांपैकी एक बनला आहे.

दरम्यान, सध्या सोशल मीडियावर आणि राजकीय वर्तुळात इमरान खान यांच्या मृत्यूबाबत चर्चा सुरू असली तरी त्यांच्या मृत्यूची कोणतीही अधिकृत पुष्टी झालेली नाही. त्यामुळे पत्रकाराने केलेला दावा हा सध्या अपुष्ट आहे. इमरान खान यांच्या कुटुंबीयांना आणि पक्षाला त्यांच्या भेटीबाबत परवानगी न मिळणे, त्यांच्या प्रकृतीबाबत यापूर्वी उपस्थित झालेले प्रश्न आणि आता समोर आलेला हा दावा यामुळे त्यांच्या प्रकृतीबाबतची चिंता मात्र वाढली आहे.