जकार्ता – ऑपरेशन सिंदूरमध्ये भारताच्या राफेल या अत्याधुनिक लढाऊ विमानांनी जोरदार कामगिरी केली. पाकिस्तान आणि चीनने या विमानाच्या क्षमतेबाबत प्रश्‍नचिन्ह निर्माण करणारा प्रचार सुरू केला मात्र राफेलला मिळालेले यश जगाच्या नजरेतून लपून राहू शकले नसल्याचे दिसते आहे. त्याचे कारण म्हणजे इंडोनेशिया या मुस्लिबहुल देशानेही आता फ्रान्सकडून ४२ राफेल लढाऊ विमानांसाठी करार केला आहे. बुधवारी जकार्ता येथे फ्रान्सचे अध्यक्ष इमॅन्युएल मॅक्रॉन यांच्या उपस्थितीत हा करार करण्यात आला.

डसॉल्ट एव्हिएशन कंपनीचे सीईओ एरिक टॅपियर म्हणाले की इंडोनेशियाला २०२६ मध्ये पहिले राफेल लढाऊ विमान मिळेल. फ्रान्सची इंडसॉल्ट एव्हिएशन कंपनी राफेल लढाऊ विमाने बनवते. ऑपरेशन सिंदूर दरम्यान, सुखोई लढाऊ विमाने तसेच राफेल लढाऊ विमानांच्या स्कॅल्प, हॅमर आणि मेटेअर क्षेपणास्त्रांनी पाकिस्तानी हवाई तळ आणि दहशतवादी छावण्यांना प्रचंड नुकसान केले.

तथापि, हल्ल्यानंतर लगेचच पाकिस्तान आणि चीनच्या सरकारी माध्यमांनी राफेलच्या अपयशाच्या खऱ्या आणि खोट्या बातम्या पसरवण्यास सुरुवात केली.आता हे स्पष्ट झाले आहे की ऑपरेशन सिंदूरच्या यशानंतरच इंडोनेशियाने फ्रान्ससोबत राफेल करारावर स्वाक्षरी केली आहे. दोन्ही देशांमध्ये बराच काळ चर्चा सुरू होती. चिनी माध्यमांनीही इंडोनेशियाने राफेल करार रद्द केल्याची बातमी पसरवली होती.

भारतीय हवाई दल २०१९ पासून फ्रान्सची ३६ राफेल लढाऊ विमाने वापरते. गेल्या महिन्यातच भारताने राफेल लढाऊ विमानांच्या २६ सागरी आवृत्त्यांसाठी फ्रान्ससोबत करार केला. या करारानुसार, फ्रान्स भारतात राफेल लढाऊ विमानांच्या फ्यूजलेजसाठी एक उत्पादन सुविधा तसेच २६ लढाऊ विमानांसह शस्त्रे आणि इतर लष्करी उपकरणे तयार करेल आणि एक एमआरओ (देखभाल, दुरुस्ती ओव्हरहॉलिंग) केंद्र देखील स्थापित करेल.

संरक्षण मंत्रालयाच्या मते, हवाई दलाच्या ३६ राफेल लढाऊ विमानांच्या कराराप्रमाणेच, नौदलासाठीचा करार देखील दोन्ही देशांच्या सरकारांमधील आंतरसरकारी करार (आयजीए) द्वारे करण्यात आला आहे. या करारानुसार, भारताला फ्रान्सकडून २२ सिंगल-सीटर डेक-आधारित लढाऊ विमाने आणि चार टू-इन ट्रेनर विमाने मिळतील. यासोबतच, फ्रान्स पायलट प्रशिक्षण, सिम्युलेटर (व्हर्च्युअल प्रशिक्षण), शस्त्रे आणि इतर लष्करी उपकरणे आणि रसद यासाठी देखील जबाबदार असेल.