मुंबई :  अभिनेत्री केतकी चितळे तिच्या सोशल मीडियाच्या पोस्ट मुळे पुन्हा एकदा वादात अडकली आहे.  केतकी चितळेने राष्ट्रवादी काँग्रेसचे शरद पवारांवर आक्षेपार्ह भाषेत लिहिलेली पोस्ट शेअर केली आहे. या प्रकरणी तिच्याविरोधात पोलिसांत गुन्हा देखील दाखल झाला आहे. यावरुन आता राष्ट्रवादी चांगलीच आक्रमक झाली आहे. याबाबत राष्ट्रवादीच्या नेत्या रुपाली पाटील यांनी केतकी चितळेला चोप देणार असल्याचा इशारा दिला आहे.

“केतकी चितळे तिच्या आजोबांच्या वयाच्या माणसाबाबत अशी भाषा वापरत आहे. ही मनोरुग्ण अभिनेत्री आहे. जातीजातीमध्ये तेढ वाढण्याचे पोरखेळ त्वरित बंद झाले पाहिजेत. केतकी चितळे आजारी असून तिच्यावर उपचार सुरु आहेत. तिच्या आईवडिलांचे दुर्दैव म्हणावे लागेल की त्यांनी तिला संस्कार दिलेले नाहीत. त्या पोस्टखाली अॅड. नितीन भावे असे लिहिले आहे. मला नाही वाटत कोणी नितीन भावे असतील. केतकीने जो खोडसाळपणा केला आहे त्यानंतर आता तिला तिच्याच भाषेत राष्ट्रवादीच्या महिला आघाडीकडून चोप देण्यात येणार आहे,” असे रुपाली पाटील म्हणाल्या.

“याच्यामध्ये बदनामी केली म्हणून ५०४ अंतर्गत गुन्हा दाखल होतो. गुन्हा दाखल करून असे विकृत जागेवर येत नसतात, आणि केतकी सारखे तर नाहीच नाही. मध्यंतरी तिच्याविरोधात बोलणाऱ्या ट्रोलर्सवरुन आम्ही भाष्य केले होते. मात्र तिने आता कळसच गाठला आहे. छडी वाजे छम छम या उक्ती प्रमाणे तिला छड्या दिल्या की, ती जागेवर येईल आणि तिचे संस्कारही जागेवर येतील,” असेही रुपाली पाटील म्हणाल्या.

“शरद पवारांविषयी बोलण्याची तिची पात्रता नाही आणि जे काही बोलली आहे त्याला कुठलाही अर्थ नाही. आमच्या सारख्यांच्या भावना दुखावल्या गेल्या म्हणून तिला चार पाच चापटी मिळाल्या ना तर ती आजारातून लवकर बरी होईल. तिचा नंबर फेसबुकवर टाकून आम्ही ती ज्या भाषेत बोलली आहे त्याच्या खालच्या भाषेत कमेंन्ट करण्यास सांगणार आहोत,” असेही रुपाली पाटील म्हणाल्या.