ICC Womens ODI World Cup 2025 : यंदा भारत आणि श्रीलंका यांच्या संयुक्त यजमानपदाखाली महिला विश्वचषक 2025 चे आयोजन होणार आहे. ही महत्त्वाची स्पर्धा 30 सप्टेंबरपासून सुरू होणार असून, यात जगभरातील एकूण 8 संघ सहभागी होणार आहेत. दरम्यान, पाकिस्तान संघाने या स्पर्धेच्या उद्घाटन समारंभाला भारतात न येण्याचा निर्णय घेतला आहे. याबाबत एका वृत्तसंस्थेने याबाबत माहिती दिली आहे.

पाकिस्तानचा संघ उद्घाटन समारंभासाठी येणार नाही –

यंदाच्या महिला एकदिवसीय विश्वचषकाचा पहिला सामना 30 सप्टेंबर रोजी खेळला जाणार आहे. पाकिस्तानचा महिला संघ आपला पहिला सामना दोन दिवसांनंतर, म्हणजेच 2 ऑक्टोबर रोजी बांगलादेशविरुद्ध खेळणार आहे. दुसरीकडे, वृत्तसंस्था आयएएनएसने जियो सुपरच्या हवाल्याने माहिती दिली आहे की, फातिमा सनाच्या नेतृत्वाखालील पाकिस्तानी महिला संघ विश्वचषकाच्या उद्घाटन समारंभात सहभागी होणार नाही. याचा अर्थ असा की, हा संघ भारतात येणार नाही.

गुवाहाटीत होणार भव्य समारोह –

महिला एकदिवसीय विश्वचषकाचा उद्घाटन समारंभ गुवाहाटीतील बरसपारा स्टेडियमवर होणार आहे. हा समारंभ भव्य आणि शानदार करण्यासाठी तयारी सुरू झाली आहे. यावेळी गायिका श्रेया घोषाल आपल्या सुमधुर गायनाने उपस्थितांचे मनोरंजन करणार आहे. यावेळी पाकिस्तान वगळता उर्वरित सात संघ उद्घाटन समारंभाचा आनंद घेताना दिसणार आहेत. पाकिस्तानच्या भारतात न येण्यामागे चॅम्पियन्स ट्रॉफी 2025 चे कारण मानले जात आहे. विशेष म्हणजे, ही स्पर्धा पाकिस्तानच्या यजमानपदाखाली झाला होता, परंतु भारतीय संघाने पाकिस्तानात जाण्यास नकार दिला होता आणि त्यांचे सर्व सामने संयुक्त अरब अमिरातीत खेळले गेले होते.

हेही वाचा – Rohit Sharma : ‘मुबंईचा राजा म्हणू नका…’, रोहित शर्माने हात जोडून चाहत्यांना केलं आवाहन, पाहा VIDEO

महिला एकदिवसीय विश्वचषक 2025 साठी पाकिस्तानचा संघ:

फातिमा सना (कर्णधार), मुनीबा अली सिद्दीकी, डायना बेग, आलिया रियाज, नशरा सुंधू, इमान फातिमा, ओमैमा सोहेल, नतालिया परवेझ, रमीन शमीम, सदफ शमास, सादिया इकबाल, शवाल झुल्फिकार, सिद्रा अमीन, सिद्रा नवाज (यष्टीरक्षक), सय्यदा अरुब शाह.