ICC New Rules Penalty Runs For Batters Time Waste Womens Ball Changes : आंतरराष्ट्रीय क्रिकेट परिषद अर्थात आयसीसीने (ICC) खेळाचा वेग आणि शिस्त राखण्यासाठी क्रिकेटच्या नियमावलीत मोठे बदल केले आहेत. १ ऑक्टोबर २०२६ पासून हे नवे नियम आंतरराष्ट्रीय क्रिकेटमध्ये लागू झाले आहेत. या नव्या नियमांनुसार, आता फलंदाजांनी वेळकाढूपणा केल्यास त्यांची गय केली जाणार नाही. फलंदाजाने खेळपट्टीवर वारंवार विनाकारण वेळ वाया घालवल्यास त्याच्या संघाला थेट ५ पेनल्टी धावांचा (5 Penalty Runs) मोठा भुर्दंड सहन करावा लागणार आहे.

फलंदाजांना दोनदा ताकीद; तिसऱ्या चुकीवर प्रतिस्पर्ध्याला ५ धावा!

नव्या नियमानुसार, गोलंदाज आणि क्षेत्ररक्षक संघ पुढचा चेंडू टाकण्यासाठी सज्ज असताना फलंदाजालाही लगेच तयार राहावे लागेल. एका डावात फलंदाजाने पहिल्यांदा वेळ वाया घालवल्यास पंच त्याला केवळ पहिली ताकीद देतील. दुसऱ्या चुकीच्या वेळी ही अंतिम चेतावणी असेल. मात्र, तिसऱ्यांदा आणि त्यानंतर प्रत्येक वेळी फलंदाजाने दिरंगाई केल्यास पंच क्षेत्ररक्षण करणाऱ्या प्रतिस्पर्धी संघाच्या खात्यात ५ पेनल्टी धावा जमा करतील.

कसोटी क्रिकेटमध्ये दर ८० षटकांनंतर ताकीद ‘रिसेट’ होणार!

Pink-ball use in daytime Tests, new rules to address time-wasting and standardising ball specifications are a part of the updated ICC Playing Conditions.https://t.co/SokREflr7w

— ICC (@ICC) October 1, 2026

कसोटी किंवा प्रथम श्रेणी (मल्टी-डे) क्रिकेटमध्ये या चेतावण्यांचा हिशोब संपूर्ण डावात सलग सुरू राहणार नाही. डावात ८० षटके पूर्ण झाल्यानंतर या चेतावण्या पुन्हा ‘रिसेट’ (शून्य) केल्या जातील. त्यानंतरच्या प्रत्येक ८० षटकांच्या टप्प्यात पुन्हा नव्याने पहिली आणि दुसरी ताकीद दिली जाईल व तिसऱ्या चुकीपासून ५ धावांची पेनल्टी आकारली जाईल.

महिला आणि ज्युनियर क्रिकेटसाठी आता स्वतंत्र चेंडू!

ICC’s new changes from October 1 👀

🔹 Batter wasting time: first offence warning, second offence final warning, third and subsequent offences 5 penalty runs
🔹 Separate ball size and weight requirements for men’s, women’s and junior cricket
🔹 Overthrow definition clarified
🔹… pic.twitter.com/msB0L4Nznk

— Cricinfo (@cricinfo) October 1, 2026

आयसीसीने महिला क्रिकेटच्या बाबतीतही एक महत्त्वाचा निर्णय घेतला आहे. आतापर्यंत महिला आणि ज्युनियर क्रिकेटसाठी एकाच मापाचा चेंडू वापरला जात होता. आता पुरुष, महिला आणि ज्युनियर अशा तिन्ही श्रेणींसाठी चेंडूचा आकार आणि वजनाच्या तीन स्वतंत्र मर्यादा निश्चित करण्यात आल्या आहेत. याशिवाय दिवस-रात्र (डे-नाईट) कसोटी सामन्यांसाठी गुलाबी चेंडूचा (Pink Ball) वापर अधिकृत पर्यायांमध्ये समाविष्ट करण्यात आला आहे.

हेही वाचा – World Cup 2027 Schedule : वनडे वर्ल्डकप २०२७ चं वेळापत्रक जाहीर! ‘या’ दिवशी होणार भारत विरुद्ध पाकिस्तान सामना, पाहा संपूर्ण वेळापत्रक

धावबाद आणि यष्टिचितच्या नियमातही बदल; चेंडूवर पूर्ण नियंत्रण अनिवार्य!

रनआऊट आणि स्टंपिंगच्या नियमांमध्येही आयसीसीने अधिक पारदर्शकता आणली आहे. नव्या नियमांनुसार, यष्टी उखडताना किंवा बेल्स उडवताना क्षेत्ररक्षक किंवा यष्टिरक्षकाचे चेंडूवर पूर्ण नियंत्रण असणे बंधनकारक असेल. चेंडूचा केवळ स्पर्श होऊन यष्टी पडल्यास फलंदाजाला बाद दिले जाणार नाही.