Mahadev Jankar makes a major sensational revelation : सध्या कोल्हापूर जिल्ह्यातील अत्यंत महत्वाच्या मानल्या जाणाऱ्या गोकुळ दूध संघाच्या निवडणुकीची धामधूम सुरू आहे. या पार्श्वभूमीवर राजकीय वातावरण तापले असतानाच माजी मंत्री महादेव जानकर यांनी मोठा गौप्यस्फोट केल्याने खळबळ उडाली आहे.

“दुग्धविकास मंत्री असताना काहींनी ‘गोकूळ’ दूध संघ मल्टीस्टेट करण्याचा घाट घातला होता. गोकुळ दूध संघाच्या खाजगीकरणासाठी मला दोनशे कोटी रुपयांची ऑफर आली होती.” असा गौप्यस्फोट महादेव जानकर यांनी केला आहे. त्यांनी केलेल्या या दाव्यामुळे राजकीय वातावरण आणखी तापणार असल्याची चर्चा आहे.

जिल्ह्यातील राधानगरी तालुक्यातील एका कार्यक्रमात बोलताना जानकर यांनी हा गौप्यस्फोट केला. २०१४ मध्ये देवेंद्र फडणवीस मुख्यमंत्री असताना हा प्रकार घडल्याचा दावाही त्यांनी केला आहे. ऐन निवडणुकीच्या काळात महादेव जानकर यांनी केलेल्या या गौप्यस्फोटामुळे अनेक प्रश्न उपस्थित केले जात आहेत.

निवडणुकीच्या रणधुमाळीत आधीच आरोप-प्रत्यारोप यामुळे राजकीय वातावरण तापले असताना जानकर यांच्या या दाव्याने नव्या चर्चांना उधाण आले आहे. जानकर म्हणाले “वैयक्तिक स्वार्थासाठी मी राजकारणात आलो नसून सामाजिक सुधारणा, सर्वसामान्य जनतेच्या विकासासाठी मी सतत कार्यरत आहे. जनतेनं मला दिलेल्या प्रेमामुळे मी व माझ्या पक्षाने सत्तास्थाने काबीज केली याची मला जाणीव आहे. या जाणिवेतूनच मी राज्याचा दुग्धविकास मंत्री असताना गोकूळ दूध उत्पादकांचाच राहावा यासाठी मला मिळालेली आर्थिक आमिषे मी ठोकरली.”

पुढे बोलताना ते म्हणाले “आताच्या निवडणुकीतही मतदारांनी ‘गोकूळ’ दूध उत्पादकांच्या मालकीचा राहावा या भूमिकेला समर्थन देण्याची भूमिका मतदानाच्या माध्यमातून बजवावी.” महादेव जानकर यांनी केलेल्या या गौप्यस्फोटावरुन स्थानिक नेत्यांच्या काय प्रतिक्रिया येतात हे पाहणे महत्वाचे ठरणार आहे.

Wai News: आई हंबरते… लेकरू मात्र बेपत्ता! वाई तालुक्यात दुधाच्या लालसेने माणुसकी वेशीवर टांगली