Pradeep Purnekar case : ठाण्यात ठाकरे गटाचे विभागप्रमुख प्रदीप पूर्णेकर यांच्यावर झालेल्या गोळीबार आणि हल्ल्याच्या प्रकरणाने खळबळ उडाली आहे. या प्रकरणाचा तपास ठाणे गुन्हे शाखेकडे वर्ग करण्यात आला असून, पोलिसांनी आरोपींच्या शोधासाठी नऊ पथके रवाना केली आहेत.

या प्रकरणाचा सखोल तपाल पोलीस करत असून आता पोलिसांनी आणखी दोन जणांना अटक केली आहे. ठाणे गुन्हे शाखेचे डीसीपी अमरसिंह जाधव यांच्या नेतृत्वाखाली आरोपींचा शोध सुरू होता. यापूर्वी पप्या शिंदे यालाही पोलिसांनी ताब्यात घेतले होते.

पोलिसांच्या माहितीनुसार, निखिल यादव हा प्रदीप पूर्णेकर यांच्या कार्यालयाच्या बाजूला असलेल्या वडापावच्या गाडीवर काम करत होता. तर नितेश पवार उर्फ भावड्या हा सराईत गुन्हेगार असून, त्याच्यावर यापूर्वीही गंभीर स्वरूपाचे गुन्हे दाखल असल्याची माहिती आहे. या दोघांना पोलिसांनी अटक केली आहे.

प्रदीप पूर्णेकर यांच्यावर हल्ला करण्यापूर्वी मोठ्या प्रमाणात रेकी करण्यात आली असावी, असा पोलिसांचा संशय आहे. या दिशेनेही तपास सुरू आहे. पोलिसांना मिळालेल्या माहितीनुसार, निखिल यादव आणि नितेश पवार हे मुंबई-गोवा महामार्गावरील अलिबागजवळ एका डेअरीत लपून बसले होते.

अलिबागजवळील डेअरीवर छापा टाकून घेतले ताब्यात

यापूर्वी पोलिसांनी मिरा-भाईंदर परिसरातून पप्या शिंदेच्या संपर्कात असलेल्या काही महिला आणि पुरुषांना चौकशीसाठी ताब्यात घेतले होते. त्यांच्या चौकशीतून आरोपी कोणत्या ठिकाणी लपून बसले असावेत, याबाबत पोलिसांना माहिती मिळाल्याचे सांगितले जात आहे. त्यानंतर पोलिसांनी अलिबागजवळील डेअरीवर छापा टाकून निखिल यादव आणि नितेश पवार यांना ताब्यात घेतले.

तपासाला वेग येणार 

पोलिसांच्या तपासानुसार, निखिल यादव याने प्रदीप पूर्णेकर यांच्यावर गोळीबार केला होता. तर नितेश पवार उर्फ भावड्या याने त्यांच्यावर कोयत्याने वार केल्याचा आरोप आहे. प्रदीप पूर्णेकर यांच्या हल्ल्याप्रकरणी पाच मुख्य आरोपी असल्याचे तपासात समोर आले आहे. त्यापैकी पप्या शिंदे, निखिल यादव आणि नितेश पवार हे तिघे आता पोलिसांच्या ताब्यात आहेत. त्यामुळे या प्रकरणाच्या तपासाला आणखी वेग येण्याची शक्यता आहे.

दोघे अद्याप फरार

संतोष कनोजिया उर्फ टल्ली हा अद्याप फरार आहे. तसेच हल्ल्यातील आणखी एका आरोपीने हेल्मेट घातले असल्याने त्याची ओळख अद्याप पटलेली नाही. मात्र, निखिल यादव आणि नितेश पवार यांच्या चौकशीतून या आरोपीबाबत महत्त्वाची माहिती मिळण्याची शक्यता पोलिसांकडून व्यक्त केली जात आहे.

पूर्णेकर कुटुंबीयांचे गंभीर आरोप

दरम्यान, पूर्णेकर कुटुंबीयांनी माजी महापौर आणि शिंदे गटाच्या नगरसेविका मिनाक्षी शिंदे तसेच त्यांच्या पतीवर गंभीर आरोप केले आहेत. या आरोपांवर मिनाक्षी शिंदे आज पत्रकार परिषद घेऊन आपली भूमिका स्पष्ट करणार आहेत. त्यामुळे त्या पत्रकार परिषदेत नेमकं काय सांगणार, याकडे सर्वांचे लक्ष लागले आहे.

Janhavi Killekar: ‘बिस्लेरीने अंघोळ का?’ ट्रोलिंगनंतर जान्हवी किल्लेकरचा संताप; दाखवले चेहऱ्याचे जुने फोटो