Rupali Chakankar : ‘मी बुवाबाजी मानत नाही, तो…’; रुपाली चाकणकरांनी अशोक खरातविषयी नेमकं काय सांगितलं?
Rupali Chakankar : एका यूट्यूब चॅनेलला दिलेल्या मुलाखतीत त्यांनी अशोक खरातसोबतच्या ओळखीबाबत आणि या संपूर्ण प्रकरणावर सविस्तर भाष्य केले आहे.
Rupali Chakankar : राज्य महिला आयोगाच्या माजी अध्यक्षा रुपाली चाकणकर पुन्हा एकदा चर्चेत आल्या आहेत. नाशिकमधील भोंदूबाबा अशोक खरात प्रकरणामुळे त्यांना मोठ्या टीकेचा सामना करावा लागला होता. या प्रकरणाचे गांभीर्य लक्षात घेऊन राज्य सरकारने तपासासाठी विशेष तपास पथकाची (SIT) स्थापना केली होती.
या प्रकरणानंतर रुपाली चाकणकर यांना राज्य महिला आयोगाच्या अध्यक्षपदाचा राजीनामा द्यावा लागला होता. त्यावेळी त्यांनी आपल्यावरील आरोप फेटाळून लावत आपली बाजू मांडली होती. एका यूट्यूब चॅनेलला दिलेल्या मुलाखतीत त्यांनी अशोक खरातसोबतच्या ओळखीबाबत आणि या संपूर्ण प्रकरणावर सविस्तर भाष्य केले आहे.
‘मी बुवाबाजी मानत नाही‘; रुपाली चाकणकरांची भूमिका
अशोक खरात प्रकरणावर बोलताना रुपाली चाकणकर यांनी आपली भूमिका स्पष्ट केली. त्या म्हणाल्या की, गुरुपौर्णिमेला आमचे कुटुंब मंदिरात जाते. महाराष्ट्रातील अनेक लोकही या दिवशी मंदिरात जातात. अध्यात्म ही प्रत्येकाची वैयक्तिक बाब आहे. २०१९ च्या आसपास अशोक खरात याच्याशी माझी ओळख झाली. तो स्वतः नौदलात असल्याचे सांगायचा. तसेच तो अंकशास्त्रज्ञ असल्याची माहिती होती.
कुटुंबीयांसोबत गुरुपौर्णिमेला मंदिरात गेले असताना शंकराच्या मंदिराच्या गाभाऱ्यात कार्यक्रम सुरू होता. त्यावेळी मंदिरात अनेक लोक उपस्थित होते. अशोक खरातच्या शेजारी पद्मश्री पुरस्कारप्राप्त व्यक्ती, आयएएस अधिकारी, खासदार आणि आमदार यांसारखे लोक बसले होते. हे सर्वजण अशोक खरातच्या अंकशास्त्रामुळे आपल्याला कसा फायदा झाला, याबाबत सांगत होते, असे चाकणकर यांनी मुलाखतीत स्पष्ट केले.
पुढे त्या म्हणाल्या की, मी बुवाबाजी मानत नाही. अशोक खरात हा अंकशास्त्रज्ञ होता. वास्तुशास्त्राप्रमाणे अंकशास्त्रही एक शास्त्र आहे, असे मला वाटत होते. त्याच्याकडे कोणत्याही प्रकारची बुवाबाजी, धागेदोरे, लिंबू-उतारे किंवा अंगारा-धुपारा असे प्रकार नव्हते. त्याला मानणारे लोकही अंधश्रद्धेशी संबंधित गोष्टींबाबत बोलत नव्हते.
अशोक खरात याची वेशभूषाही इतर तथाकथित बाबांप्रमाणे नव्हती. तो कोणताही विशेष गंध किंवा विशिष्ट वस्त्रे परिधान करत नव्हता, तर ब्लेझर घालून असायचा. त्यामुळे हा बुवाबाजीचा प्रकार असेल, असे मला त्यावेळी वाटले नाही, असे स्पष्टीकरण रुपाली चाकणकर यांनी दिले.
मोठ्या बहिणीच्या माध्यमातून झाली ओळख
अशोक खरातसोबत आपली पहिली ओळख कशी झाली, याचाही खुलासा रुपाली चाकणकर यांनी केला. त्या म्हणाल्या, पुण्यात एका लग्नसमारंभाचे आयोजन करण्यात आले होते. या लग्नाला अशोक खरात याचे कुटुंबीय उपस्थित होते. माझ्या मोठ्या बहिणीनेही या लग्नाला हजेरी लावली होती. त्यावेळी तिची अशोक खरातच्या कुटुंबीयांशी ओळख झाली. रुपाली चाकणकर यांनी मुलाखतीत केलेल्या या खुलाशांमुळे हे प्रकरण पुन्हा चर्चेत आले आहे.
