Deepika Chikhalia : नितेश तिवारी दिग्दर्शित ‘रामायण’ चित्रपट सध्या बॉक्स ऑफिसवर चर्चेचा विषय ठरत आहे. चित्रपटातील भव्य दृश्ये, कलाकारांचा अभिनय आणि युद्धाचे प्रसंग प्रेक्षकांचे लक्ष वेधून घेत आहेत. विशेषतः रावण आणि जटायू यांच्यातील युद्धाच्या दृश्याचे प्रेक्षकांकडून कौतुक होत आहे.

मात्र, आता याच चित्रपटातील माता सीतेच्या ॲक्शन सीनवरून नवा वाद निर्माण झाला आहे. या दृश्यावर अभिनेत्री आणि जुन्या रामायण मालिकेतील सीतेची भूमिका साकारणाऱ्या दीपिका चिखलिया यांनी नाराजी व्यक्त केली आहे.

१९८७ मध्ये छोट्या पडद्यावर प्रसारित झालेल्या रामायण मालिकेने प्रेक्षकांच्या मनावर अक्षरशः अधिराज्य गाजवले होते. या मालिकेत अभिनेत्री दीपिका चिखलिया यांनी माता सीतेची भूमिका साकारली होती. त्यांच्या अभिनयाला प्रेक्षकांनी भरभरून प्रेम दिले. त्यामुळे आजही त्यांची सीतेच्या भूमिकेसाठी विशेष ओळख आहे.

दरम्यान, नितेश तिवारी यांच्या ‘रामायण’ चित्रपटात अभिनेत्री साई पल्लवी माता सीतेची भूमिका साकारत आहे. मात्र, चित्रपटातील तिच्या ॲक्शन सीनमुळे सोशल मीडियावर चर्चा सुरू झाली असून काही नेटकऱ्यांकडून तिला ट्रोल केले जात आहे.

दीपिका चिखलिया यांनी व्यक्त केली नाराजी

या वादावर आता दीपिका चिखलिया यांनी आपली प्रतिक्रिया दिली आहे. चित्रपटातील सीतेच्या ॲक्शन सीनबाबत बोलताना त्या म्हणाल्या, “यावर काय बोलावं हे मला खरंच कळत नाही. मला वाल्मीकी रामायण आणि तुलसीदासांचे रामायण आठवते. आपल्या रामायणातही असे अनेक घटक होते. पण त्यात असे कोणतेही सीन्स दाखवल्याचे मला आठवत नाही.”

स्टारकास्टमुळेही चित्रपटाची चर्चा

या चित्रपटाची निर्मिती प्राईम फोकस स्टुडिओ आणि यशच्या मॉन्स्टर माइंड क्रिएशन्सने केली आहे. चित्रपटात रणबीर कपूर, यश आणि साई पल्लवी प्रमुख भूमिकेत आहेत. याशिवाय सनी देओल, रवी दुबे, काजल अग्रवाल, रकुल प्रीत सिंग आणि विवेक ओबेरॉय यांच्याही महत्त्वपूर्ण भूमिका आहेत.

Donald Trump: ‘डॅना, ही नोकरी स्वीकारा!’ ; ट्रम्प यांची UFC प्रमुखांना थेट व्हाईट हाऊसची ऑफर