Vinod Kambli part time job offer story : विनोद कांबळीचं नाव ऐकलं की सर्वप्रथम मनात येतं ते म्हणजे सचिन तेंडुलकरचा बालमित्र. प्रतिभेत तो सचिनपेक्षा कमी नव्हता, पण… कमी वयात मिळालेलं यश, कीर्ती आणि संपत्ती यामुळे तो भरकटला. ज्यानी १९९० चा दशक पाहिलाय, त्यांना आजही आठवत असेल की कांबळी कसा गोलंदाजांची दाणादाण उडवायचा. मात्र, शिस्तीचा अभाव आणि भरकटल्यामुळे त्याचं करिअर लवकर संपुष्टात आलं. आता सचिन आणि कांबळीचा मित्र असलेल्या व्यक्तीने एक खास किस्सा सांगितला आहे.

क्रिकेटवर लक्ष केंद्रित करण्यासाठी विनोद कांबळी तेव्हा पार्ट-टाइम जॉबची ऑफर नाकारली होती, जेव्हा त्याचे बरेचसे सहकारी खेळाडू क्रिकेट खेळण्याबरोबरच छोटी-मोठी कामेही करत होते, असा खुलासा मित्राने केला आहे. विनोद कांबळी गेल्या वर्षी डिसेंबरमध्ये गंभीर आजारी पडल्याने चर्चेत आला होता. क्रिकेट विश्वातील अनेक दिग्गजांनी त्याला आर्थिक मदत देण्याची तयारी दाखवली होती. आज कांबळी कदाचित आर्थिक अडचणीत असला, तरी त्यानी पैशाची कधीच फिकीर केली नाही.

सचिन आणि कांबळीच्या मित्राने सांगितली एक अनामिक गोष्ट –

सचिन आणि कांबळी दोघांचेही मित्र असलेल्या सोली अॅडम यांनी द इंडियन एक्सप्रेसला सांगितले की, सचिन १९९२ मध्ये यॉर्कशायरमध्ये सामील झाला. या इंग्लिश क्लबने करारबद्ध केलेला तो पहिला परदेशी खेळाडू ठरला. त्यावेळी विनोद कांबळी देखील इंग्लंडमध्ये होता आणि लहान क्लब क्रिकेट खेळायचा. तो तिथे प्रसिद्ध होता आणि त्याचे बरेच मित्र होते. तोपर्यंत सचिनने कसोटी पदार्पण केले होते आणि तो आंतरराष्ट्रीय क्रिकेटमध्ये एक उदयोन्मुख स्टार होता. कांबळीची कसोटी कारकीर्द अजून सुरूही झाली नव्हती.

हेही वाचा – Wimbledon 2025 : स्वितोलिनाचा विम्बल्डनमध्ये धमाकेदार विजय, पहिल्याच फेरीत बोंडारला चारली धूळ!

सोली अॅडम हे एक व्यावसायिक असून त्यांना क्रिकेटची आवड आहे. ते सचिन तेंडुलकर आणि कांबळी दोघांचेही मित्र आहेत. त्यांनीच या मास्टर-ब्लास्टरला यॉर्कशायरकडून खेळण्यास राजी केले. एके दिवशी सोलींच्या घरी अनेक क्रिकेटपटू जमले होते. त्यात अनेक भारतीय क्रिकेटपटू होते. क्लब क्रिकेटमधून खर्च भागवणे कठीण असल्याने अनेक क्रिकेटपटू त्यांच्या पेट्रोल पंप, कारखान्यात किंवा शॉपिंग सेंटरमध्ये अर्धवेळ नोकरी करत असत.

हेही वाचा – Vaibhav Suryavanshi : वैभव सूर्यवंशीला बाद करताच इंग्लंडच्या गोलंदाजाने गमावला संयम, रंगला नवा वाद!

कांबळीमध्ये प्रचंड आत्मविश्वास होता – 

सोली म्हणाले, ‘एके दिवशी आम्ही बसलो होतो, तिथे १० क्रिकेटपटू असतील. विनोद आणि सचिन वगळता, सर्वजण पार्ट-टाइम जॉबला करत होते. मग मुंबईतील एका क्रिकेटपटूने विनोदला विचारले, तुम्ही एका सामन्यातून फक्त २५ पौंड कमावता, तुम्ही सोलीच्या जागी काही काम का करत नाही? कांबळी एक मिनिटही वेळ न घेता उत्तरला सचिन आणि मी कसोटी क्रिकेट खेळून पैसे कमवू. मी पार्ट-टाइम नोकरी करून माझे लक्ष विचलित करू इच्छित नाही.’ ही असाधारण बाब होती. कारण त्याच्यात इतका आत्मविश्वास होता. तो खूप लहान होता आणि त्याने अजून एकही कसोटी खेळली नव्हती पण त्याच्यात प्रचंड आत्मविश्वास होता.’