आळंदी – ‘आंतरराष्ट्रीय मानवाधिकार दिना’चे औचित्य साधून लायन्स चिंचवड राॅयल क्लबच्या माध्यमातून आळंदी येथील आवारी हाॅस्पिटलच्या स्त्रीरोग तज्ञ डाॅ. ज्योत्स्ना आवारी यांनी पुणे शहरातील देहविक्री करणाऱ्या महिलांसाठी आरोग्य शिबिर राबवले. यावेळी महिलांची आरोग्य तपासणी करून त्यांना हेल्थ किट देण्यात आले. तसेच आरोग्याविषयी मार्गदर्शन करण्यात आले. नियमित रक्ततपासणी, साखरेची तपासणी, एचबीए१सी, लिपिडी प्रोफाइल, इजीजी, टूडी इको, सिटी एन्जिओ, हाडांची तपासणी, थायरॉइड यांची तपासणी करणे आवश्यक असल्याचे सांगितले. योग्य प्रमाणात वजन कमी केल्याने मधुमेह, हृदयविकार यांसारखे गंभीर आजार टाळता येऊ शकतात, असेही डाॅ. जोत्स्ना आवारी यांनी सांगितले. यावेळी 20हून अधिक महिलांची तपासणी करण्यात आली.

दरम्यान, 1950 सालापासून 10 डिसेंबर हा दिवस आंतरराष्ट्रीय मानवाधिकार दिवस म्हणून साजरा करण्यात येतो. या वर्षीची आंतरराष्ट्रीय मानवाधिकार दिवसाची थीम ‘Reducing inequalities and Advancing human rights’ ही आहे. अर्थात असमानता कमी करणे आणि मानवी हक्क प्रगत करणे अशी ही थीम आहे. या वर्षीची थीम ‘समानता’ आणि UDHR च्या कलम 1 शी संबंधित आहे. ज्यात म्हटले आहे की ‘सर्व मानव मुक्त आहे. त्यांच्या सन्मान आणि अधिकारांमध्ये समानता आहे. मानवाधिकार हा जगभरातील प्रत्येक नागरिकांचा मूलभूत अधिकार आहे. कोणत्याही जात, धर्म, पंथ, लिंग, राष्ट्र, प्रांत इत्यादींच्या आधारे कोणालाही मानवी अधिकार नाकारता येणार नाहीत असं संयुक्त राष्ट्रानं स्पष्ट केले आहे. जगातला प्रत्येक मनुष्य स्वतंत्रता, समानता आणि सन्मानाचा हक्कदार आहे, असे मानवाधिकांरांच्या घोषणा पत्रात सांगितले आहे.

मानवाधिकांरांच्या घोषणा पत्रात असे म्हटले आहे की, कोणात्याही मनुष्याला गुलामीत ठेवता येणार नाही, कोणालाही शारीरिक यातना देता येणार नाही. कोणाप्रती निर्दयता किंवा अमानवीय आणि अपमानजनक व्यवहार करता येणार नाही. जगातल्या प्रत्येकाला कायदेशीररित्या मानवी हक्काचा अधिकार आहे.