Sahar Sheikh : ठाणे महापालिकेतील एमआयएमच्या नगरसेविका सहर शेख यांनी अधिकाऱ्यांची दिशाभूल करून बनावट जात प्रमाणपत्र मिळवल्याची तक्रार त्यांच्या विरोधात दाखल झाली असून त्यांचे नगरसेवक पद धोक्यात येण्याची शक्यता व्यक्त केली जात आहे.

जानेवारी महिन्यात पार पडलेल्या ठाणे महापालिका निवडणुकीत मुंब्रा येथील प्रभाग क्रमांक 30 चर्चेत होता. याच प्रभागातून विजयी झाल्यानंतर सहर शेख यांच्या “कैसा हराया…” या वक्तव्याची राज्यभर चर्चा झाली होती. मात्र, आता निवडणूक लढवण्यासाठी त्यांनी जात प्रमाणपत्र मिळवण्यासाठी शासकीय यंत्रणांची दिशाभूल केल्याचा आरोप त्यांच्यावर करण्यात आला आहे.

तक्रारीनुसार, सहर शेख यांनी निवडणूक लढवताना चार महत्त्वाच्या शासकीय यंत्रणांची दिशाभूल केल्याचा आरोप आहे. त्यांनी मुंबई शहर जिल्हाधिकारी कार्यालयातून घेतलेले जात प्रमाणपत्र बनावट कागदपत्रांच्या आधारे मिळवले असल्याचे तक्रारदाराचे म्हणणे आहे. या प्रकरणात सखोल चौकशी करून फसवणुकीचा गुन्हा दाखल करण्याची मागणी करण्यात आली आहे.

नेमकं प्रकरण काय?  (Sahar Sheikh)

सहर शेख यांचे वडील युनूस इक्बाल शेख हे मूळचे उत्तर प्रदेशातील गाजियाबाद येथील रहिवासी असून नंतर महाराष्ट्रात स्थलांतरित झाले. स्थलांतरितांसाठी लागू असलेल्या नमुना 10 ऐवजी नमुना 8 चा वापर करून अधिकाऱ्यांची दिशाभूल करत जातीचा दाखला मिळवण्यात आल्याचा आरोप आहे. त्यानंतर त्याच आधारे सहर शेख यांनी मुंबई शहर जिल्हाधिकारी कार्यालयातून जात प्रमाणपत्र मिळवले आणि ठाणे महापालिकाची निवडणूक लढवली, असा आरोप आहे.

या संदर्भात ठाणे उपविभागीय अधिकारी कार्यालयात तक्रार दाखल करण्यात आली होती. 18 मार्च रोजी झालेल्या सुनावणीस युनूस शेख अनुपस्थित राहिले, तर त्यांच्या वकिलांनी काही कागदपत्रे सादर केली. त्यानंतर 23 मार्च रोजी झालेल्या सुनावणीत तहसीलदारांनी जात प्रमाणपत्रातील काही त्रुटी निदर्शनास आणल्या.

दरम्यान, ठाण्यात वास्तव्यास असतानाही मुंबई शहर जिल्हाधिकारी कार्यालयातून जात प्रमाणपत्र घेण्यामागील हेतूवरही प्रश्न उपस्थित होत आहेत.

कोण आहेत सहर शेख?

सहर शेख सध्या ठाणे महानगरपालिकेत एमआयएमच्या नगरसेविका आहेत. जानेवारी 2026 मध्ये झालेल्या निवडणुकीत सहर शेख ठाण्यातील मुंब्रा परिसरातील प्रभाग क्रमांक 30 मधून निवडून आल्या. निवडणुकीवेळी जाहीर सभेतून सहर शेख आणि तिचे वडील युनूस शेख यांनी मुंब्रातील शरद पवार गटाचे स्थानिक आमदार जितेंद्र आव्हाड यांच्यावर जोरदार शाब्दिक हल्ला चढवला होता. Sahar Sheikh

हेही वाचा : Sara Arjun: ‘धुरंधर’ची यालिना आता साऊथमध्ये! धनुषच्या चित्रपटात सारा अर्जुनची एन्ट्री