Elon Musk – स्पेसएक्सने युक्रेनमध्ये कार्यरत असलेल्या स्टारलिंक उपग्रहाशी संबंधित सेवेवर नियंत्रण आणले आहे, असे या दोन्ही कंपन्यांचे मालक असलेल्या एलॉन मस्क यांनी म्हटले आहे. रशियाबरोबर युद्ध सुरू असलेला युक्रेन स्टारलिंकच्या इंटरनेटवर सुरक्षेच्या कारणास्तव अवलंबून आहे.

गेल्या आठवड्याभरापासून या स्टारलिंकच्या इंटरनेट सुविधेमध्ये सातत्य नसणे आणि इंटरनेटची गती मंदावत असल्याची तक्रार युक्रेनचे अध्यक्ष झेलेन्स्की यांनी केली होती. त्यानंतर मस्क यांनी स्टारलिंकच्या इंटरनेटवर मर्यादा आणल्या गेल्याचे मान्य केले आहे.

स्टारलिंकच्या इंटरनेटची सेवा नागरी सेवांसाठी उपलब्ध करून दिली जाते आहे. मात्र आक्रमण करणाऱ्या ड्रोनच्या वापरासाठी हे इंटरनेट वापरले जाते आहे. या ड्रोनचा वापर मानवी संहारासाठी केला जातो आहे.

युक्रेनने स्टारलिंकबरोबरच्या अटींचे उल्लंघन केले आहे. त्याच कारणास्तव स्टारलिंकची इंटरनेट सेवा गेल्या आठवड्यात स्थगित करण्यात आली होती, असे मस्क यांनी आपल्या पोस्टमध्ये म्हटले आहे.

सुरक्षा विषयक इंटरनेटसाठी स्टारलिंकच्या स्टारशील्ड कंपनीकडून इंटरनेट उपलब्ध करून दिले जाते. स्टारलिकंकडून स्टारशील्डला होणारा इंटरनेट पुरवठा रविवारपासून पुन्हा सुरू करण्यात आला आणि दरम्यान आता इंटरनेट सेवा पुन्हा पुर्ववत सुरू झाल्याचे झेलेन्स्की यांनीही म्हटले आहे.

सेवा खेडीत होण्यापुर्वी जेवढ्या वेगाने इंटरनेट उपलब्ध होत होते, तेवढ्या वेगाने आता सेवा मिळू लागली आहे. सुरक्षा यंत्रणांना आवश्‍यक असलेल्या वेगाने रविवार सकाळपर्यंत इंटरनेट सेवा पुन्हा सुरू झाली आहे, असे झेलेन्स्की यांनी म्हटले आहे.