Supriya Sule : काल ९ फेब्रुवारी अचानक राष्ट्रवादी काँग्रेस पक्षाचे ज्येष्ठ नेते शरद पवार यांना बारामतीमधून पुण्यातील रुबी हॅाल क्लिनिकमध्ये दाखल करण्यात आले. त्यानंतर सर्वत्र त्यांना नेमकं काय झालंय की अचानक रुग्णालयात भरती व्हावे लागत आहे, अशा चर्चा सुरू झाल्या. त्यानंतर काही वेळातच शरद पवारांना रुग्णालयात उपचारांसाठी का दाखल करण्यात आले याबाबत सांगण्यात आले. गेल्या काही दिवसांपासून शरद पवारांना काहीसा थकवा जाणवत होता. मागच्या आठवड्यात अजित पवार यांच्या अकाली निधनाने पवार कुटुंबावर दुःखाचा डोंगर कोसळला आहे. या दुःखद प्रसंगी वडीलधारे आणि कुटुंबप्रमुख म्हणून शरद पवारांकडे पाहिले जाते. पण अचानक त्यांना बारामतीमधून पुण्यातील रुबी हॅाल रुग्णालयात दाखल करण्यात आले. आता त्यांची कन्या खासदार सुप्रिया सुळे यांनी सोशल मीडियावरून पोस्ट करत शरद पवारांची हेल्थ अपडेट दिली आहे. शरद पवार यांच्या प्रकृतीविषयी खासदार सुप्रिया सुळे यांनी पोस्टद्वारे माहिती दिली आहे. “बाबांना छातीत संसर्ग झाला आहे. त्यांना 5 दिवसांच्या अँटीबायोटिक्सचा कोर्स करण्याचा सल्ला डॉक्टरांनी दिला. सुदैवाने, त्यांचे इतर सर्व रिपोर्ट्स सामान्य आहेत, त्यामुळे काळजी करण्याचे कारण नाही. तुमच्या शुभेच्छा आणि पाठिंब्याबद्दल सर्वांचे आभार. सर्व डॉक्टरांचे मनापासून आभार.” असे एक्सवरील पोस्टमध्ये सुप्रिया सुळे यांनी सांगितले आहे. शरद पवारांना रुग्णालयात दाखल करण्यात आल्यानंतर उपमुख्यमंत्री सुनेत्रा पवार यांनी रुग्णालयात जाऊन त्यांची भेट घेतली. यावेळी त्यांच्यासोबत सुप्रिया सुळे, पार्थ पवार आणि जय पवारही होते. Sharad Pawar: मागील काही दिवसांपासून अस्वस्थ वाटत होते. त्यातच कफ आणि खोकल्याचा त्रास वाढला. हा त्रास अधिक जाणवू लागल्याने शरद पवारांना तातडीने बारामतीहून पुण्यातील रुबी हॅाल रुग्णालयात उपचारांसाठी दाखल करण्यात आले. तज्ज्ञ डॉक्टरांकडून शरद पवार यांच्यावर उपचार सुरू आहेत. कुठली ही काळजी करायची गरज नाही, अशी माहिती रूबी हॉल क्लिनिकचे डॉक्टर अभिजित लोढा यांनी दिली आहे. रोहित पवार काय म्हणाले? कुठल्या ही कार्यकर्त्यांनी हॉस्पिटलमध्ये येऊ नये. हॉस्पिटलचे सगळे प्रोटोकॉल पाळावेत. आपल्यामुळे इतर रुग्ण आणि त्यांच्या नातेवाईकांना कुठला ही त्रास होणार नाही याची काळजी घ्या, असे आवाहन आमदार रोहित पवारांनी केले. त्यांची प्रकृती उत्तम आहे, अशी माहिती देखील रोहित पवार यांनी दिली. हेही वाचा : Vishal Dadlani: मंत्र्याच्या ओळखीचा वापर पडला महागात, विशाल ददलानींनी गायकासह मंत्र्यालाही केलं ब्लॉक
