Home Delivery Death: तमिळनाडूच्या तिरुपूर जिल्ह्यातून एक धक्कादायक आणि हृदयद्रावक घटना समोर आली आहे. यूट्यूबवरील व्हिडिओ पाहून पत्नीची घरीच प्रसूती करण्याचा प्रयत्न एका तरुणाला महागात पडला.

वैद्यकीय सल्ला आणि तज्ज्ञांच्या देखरेखीशिवाय केलेल्या या प्रयत्नात महिलेचा मृत्यू झाला, तर नवजात मुलीचे प्राण डॉक्टरांनी वाचवले.

उथुकुली येथील थलावाईपालयम परिसरात राहणाऱ्या शशिकला यांची ही दुसरी प्रसूती होती. पहिल्या वेळी त्यांची सिझेरियनद्वारे प्रसूती झाली होती. यावेळी मात्र नैसर्गिक प्रसूती होईल, या आशेने त्यांनी रुग्णालयात न जाता घरीच बाळंतपणाचा निर्णय घेतला. पती कार्तिक आणि सासू यांनी कोणत्याही वैद्यकीय तज्ज्ञांचा सल्ला न घेता प्रसूती करण्याचा प्रयत्न केला. (Home Delivery Death)

प्रसूतीपूर्वी कार्तिकने यूट्यूबवरील अनेक व्हिडिओ पाहून त्यातून माहिती घेतली होती. त्यानुसार त्याने आणि त्याच्या आईने शशिकला यांना प्रसूतीसाठी मदत केली. मात्र, प्रसूतीनंतर वर (प्लासेंटा) पूर्णपणे बाहेर न आल्याने शशिकला यांना प्रचंड रक्तस्राव (हेमरेज) सुरू झाला.

 

स्थिती गंभीर होताच त्यांना तातडीने पेरुंदुराई याठिकाणी सरकारी रुग्णालयात दाखल करण्यात आले. त्यानंतर अधिक उपचारांसाठी त्यांना कोईम्बतूरमधील खासगी रुग्णालयात हलवण्यात आले. डॉक्टरांनी शर्थीचे प्रयत्न केले, मात्र रविवारी उपचारादरम्यान शशिकला यांचा मृत्यू झाला. सुदैवाने, नवजात मुलीचे प्राण वाचवण्यात डॉक्टरांना यश आले.

पती आणि सासूविरुद्ध गुन्हा   (Home Delivery Death )

या घटनेची माहिती मिळताच उथुकुली पोलिसांनी गुन्हा दाखल केला असून पती कार्तिक आणि त्याच्या कुटुंबीयांविरुद्ध तपास सुरू केला आहे. वैद्यकीय सल्ल्याशिवाय घरी प्रसूती करण्याचा निर्णय आणि त्यातून झालेल्या निष्काळजीपणामुळे शशिकला यांच्या मृत्यूस ते जबाबदार असल्याचा संशय व्यक्त केला जात आहे.