Hinjawadi Marunji Road – कोट्यवधी रुपये खर्चून तयार करण्यात आलेला हिंजवडी-मारुंजी मार्ग अवघ्या तीन आठवड्यांतच उखडल्याने सार्वजनिक बांधकामाच्या गुणवत्तेवर गंभीर प्रश्नचिन्ह निर्माण झाले आहे. मान्सूनचा जोरदार पाऊस सुरू होण्यापूर्वीच रस्त्यावर खड्डे पडले आहेत. अनेक ठिकाणी डांबर निघून खडी बाहेर आली आहे. या निकृष्ट दर्जाच्या रस्त्याचे फोटो आणि व्हिडिओ सोशल मीडियावर मोठ्या प्रमाणात व्हायरल झाले असून,

नागरिकांनी प्रशासन आणि संबंधित कंत्राटदारावर तीव्र नाराजी व्यक्त केली आहे. हिंजवडी आयटी पार्क, मारुंजी आणि परिसरातील वाहतूक कोंडी कमी करण्यासाठी हा रस्ता नुकताच तयार करण्यात आला होता. रस्ता सुरू झाल्यानंतर वाहनचालकांना काहीसा दिलासा मिळाला होता. मात्र, तो आनंद फार काळ टिकला नाही. पूर्वमान्सूनच्या हलक्या पावसानेच रस्त्याचा दर्जा उघड केला. डांबर उखडले. खडी सैल झाली. अनेक ठिकाणी खड्डे पडले.

त्यामुळे वाहनचालकांना जीव धोक्यात घालून प्रवास करावा लागत आहे. रस्त्याची दुरवस्था समोर आल्यानंतर नागरिकांनी त्याचे व्हिडिओ आणि छायाचित्रे सोशल मीडियावर मोठ्या प्रमाणात शेअर केली. या निकृष्‍ट दर्जाच्‍या कामामुळे प्रशासनाच्या कामकाजावर जोरदार टीका करण्यात आली. अनेकांनी निकृष्ट दर्जाच्या कामांवर संताप व्यक्त करत दोषींवर कारवाईची मागणी केली. दररोज हजारो आयटी कर्मचारी आणि स्थानिक नागरिक या मार्गाचा वापर करतात.

रस्ता खराब झाल्याने वाहतूक मंदावली आहे. अपघाताचा धोका वाढला आहे. पावसाचा जोर वाढल्यानंतर परिस्थिती आणखी गंभीर होईल, अशी भीती व्यक्त केली जात आहे. निकृष्ट दर्जाच्या कामाचा मुद्दा आता केवळ रस्त्यापुरता मर्यादित राहिलेला नाही. सोशल मीडियावरील संतप्त प्रतिक्रियांमुळे हा विषय राज्यभर चर्चेचा बनला असून, संबंधित यंत्रणांनी तातडीने दखल घेऊन जबाबदारांवर कारवाई करावी, अशी मागणी जोर धरत आहे.