शिवशंकर निरगुडे हिंगोली : जिल्ह्यातील मराठवाडा आणि विदर्भ या जोडणाऱ्या येलदरी पुलावरून पिकअप खाली कोसळून चालकाचा दुर्दैवी मृत्यू झाला आहे. या दुर्घटनेत चालकाला वेळीच बाहेर न येता आल्यामुळे पिकअपमध्ये अडकून त्याचा दुर्दैवी मृत्यू झाला आहे. सदरील घटना काल मध्यरात्री घडली असल्याचा अंदाज आहे. दरम्यान, सेनगाव तालुक्यातील शिंदेफळ येथील पिकअप व्हॅन येलदरी नदीच्या अरुंद पुलावरून जात असताना चालकाचे नियंत्रण सुटल्याने पिकअप व्हॅन नदीत कोसळला. त्यानंतर येलदरी धरणामध्ये मासेमारी करणाऱ्या व्यक्तींनी सकाळी 10 वाजल्याच्या सुमारास पुलावरून खाली कोसळलेला पिकअप पाहिला, तेव्हा ही घटना उघडीस आली. ही माहिती पसरताच घटनास्थळी लोकांनी एकच गर्दी केली होती. तीन तासाच्या प्रयत्नानंतर चालकाचा मृतदेह बाहेर काढण्यात यश अंकुश शिंदे राहणार शिंदेफळ असे मयत पिकपअप चालकाचे नाव आहे. अपघाताची माहिती मिळताच पोलीस आणि अग्निशामक दलाने घटनास्थळी धाव घेतली. मात्र अपघातग्रस्त टेम्पो क्रेनच्या साह्याने बाहेर काढत असताना क्रेनची वायर तुटली. क्रेनची केबल तुटल्यामुळे टेम्पो नदीत कोसळला पण यात सुदैवाने कोणाला काही दुखापत झाली नाही. अखेरीस तीन तासाच्या प्रयत्नानंतर चालकाचा मृतदेह आणि अपघात ग्रस्त पिकअप व्हॅन बाहेर काढण्यात आला. या अपघातात काही काळ फुलावरील वाहतूक विस्कळीत झाली होती. Hingoli Accident News अरुंद पुलाने अनेकांचे घेतले बळी या अरुंद पुलाला दोन्ही बाजूने कठडे नसल्याने धरणाच्या कामाकरता तात्पुरत्या स्वरूपात हा पूल करण्यात आला होता. परंतु मागील 60 ते 70 वर्षापासून मराठवाडा आणि विदर्भ जोडणाऱ्या या पुलामध्ये आतापर्यंत 25 ते 30 जणांना आपला जीव गमवावा लागला. आतापर्यंत सुमारे 100 पेक्षा अधिक वाहने नदीपात्रात कोसळली फुलावरून वाहन चालवताना भीतीदायक परिस्थिती निर्माण होते. दरम्यान, मराठवाड्यात वांद्रे वडूजच्या धरतीवर पहिलाच केबल स्टेप पूल इंदरी धरणावर 70 वर्षानंतर जर्मन तंत्रज्ञानाचा वापर करून येलदरी वरील पूल तयार झाला आहे. मात्र याचे अद्यापही उद्घाटन न झाल्यामुळे अनेक अपघात होत आहेत. या अपघाताच्या संख्येत प्रचंड वाढ होत असल्याने, प्रशासनाने तात्काळ नवीन पूल चालू करावा अशी मागणी ग्रामस्थांकडून केली जात आहे. हेही वाचा: PMC Action : महापालिकेचा ‘बुलडोझर’ सुसाट! लोहगाव-वाघोलीत बड्या हॉटेल्सवर कारवाई; नागरिकांचा संताप का?
