नवी दिल्ली : रामनवमीच्या दिवशी दिल्लीतील जवाहरलाल नेहरू युनिव्हर्सिटी (जेएनयू) मध्ये विद्यार्थ्यांमध्ये  झालेला वाद अजूनही संपत नसल्याचे दिसत आहे.  त्यातच त्या वादात आणखी भर आज पडल्याचे पाहायला मिळाले.  जेएनयूच्या बाहेरील रस्त्यावर आणि मुख्य गेटजवळ भगवे झेंडे लावण्यात आले आहेत. या पोस्टर्सवर ‘भगवा JNU’ असे लिहिले आहे. हे पोस्टर्स आणि झेंडे हिंदू सेनेने लावल्याचे  म्हटले जात आहे.

एका वृत्तवाहिनीने याविषयी माहिती दिली आहे. त्यानुसार, उजव्या विचारसरणीच्या हिंदू सेनेने शुक्रवारी जवाहरलाल नेहरू विद्यापीठाच्या मुख्य गेटवर भगवे ध्वज लावले. संघटनेने कथितरित्या कॅम्पसभोवती पोस्टर चिकटवले होते, ज्यावर “भगवा जेएनयू” लिहिले होते. याप्रकरणी हिंदू सेनेचे उपाध्यक्ष सुरजित यादव यांचे वक्तव्यही समोर आले आहे. ज्यात त्यांनी जेएनयूमध्ये विरोधकांकडून भगव्याचा अपमान केल्याचे म्हटले आहे. या लोकांनी सुधारावे… भगव्याचा अपमान करण्याचा प्रयत्न करू नका. आम्ही तुमचा आदर करतो. प्रत्येक धर्माचा आणि विचारांचा आदर करा. भगव्या रंगाचा ज्या प्रकारे अपमान केला जात आहे हिंदू सेना हे सहन करणार नाही, असे म्हटले आहे.

Today morning it has come to notice that few flags and banners have been put on the road and adjoining areas near JNU. In view of recent incidents, these were promptly removed and suitable legal action is being taken: Delhi Police pic.twitter.com/4xZ35Za083

— ANI (@ANI) April 15, 2022

रामनवमीच्या दिवशी जेएनयूच्या कावेरी वसतिगृहाच्या मेसमध्ये कथित मांसाहार देण्यावरून दोन विद्यार्थी गटांमध्ये हाणामारी झाली तेव्हा दोन्ही बाजूचे डझनभर विद्यार्थी जखमी झाले होते. अखिल भारतीय विद्यार्थी परिषदेच्या सदस्यांनी वसतिगृहात येऊन मेस कर्मचाऱ्यांना मांसाहार बनण्यापासून रोखले आणि तेथे उपस्थित विद्यार्थ्यांवर हल्ला केल्याचा आरोप डाव्या विचारसरणीच्या विद्यार्थ्यांनी केला होता. त्याचवेळी, डाव्या विचारसरणीच्या विद्यार्थ्यांनी रामनवमीनिमित्त होणारी पूजा थांबवण्याचा प्रयत्न केल्याचा आरोप अभाविपच्या सदस्यांनी केला होता. या प्रकरणाचा तपास पोलीस करत आहेत. जेएनयूएसयू, एसएफआय आणि डेमोक्रॅटिक स्टुडंट्स फेडरेशनच्या वतीने एबीव्हीपीशी संलग्न असलेल्या विद्यार्थ्यांविरुद्ध एफआयआर दाखल करण्यात आल्याचे पोलिसांचे म्हणणे आहे.

जेएनयू प्रशासनाने या घटनेची स्वतंत्र चौकशी सुरू केली असून या घटनेबाबत विद्यार्थ्यांना कारवाईचा इशारा दिला आहे. विद्यार्थ्यांना शांतता राखण्याचे आवाहनही विद्यापीठाने केले आहे. दरम्यान आज जेएनयूबाहेर हे पोस्टर्स आणि झेंडे पाहायला मिळाले आहेत. जेएनयूच्या मुख्य गेटपासून ते बाहेरील रस्त्यापर्यंत ते लावण्यात आले आहेत.