Himanta Biswa Sarma : विधानसभा निवडणुकीपूर्वी जनतेला दिलेली सर्व आश्वासने पूर्ण करण्यासाठी राज्य सरकार पहिल्या दिवसापासून सातत्याने काम करत आहे, असे प्रतिपादन आसामचे मुख्यमंत्री हिमंता बिस्वा सरमा (Himanta Biswa Sarma) यांनी केले.

आगामी ६ ऑक्टोबर रोजी होणाऱ्या नागाव लोकसभा पोटनिवडणुकीत नागरिकांनी भाजप-एनडीए उमेदवाराच्या बाजूने मतदान करावे, जेणेकरून हा मतदारसंघही विकासाच्या प्रवाहात सामील होईल, असे आवाहन त्यांनी केले.

काँग्रेसकडे हा मतदारसंघ असल्यामुळे तो विकासापासून मागे पडल्याचा दावा त्यांनी केला. नागाव येथे एका प्रचारसभेला संबोधित करताना सरमा (Himanta Biswa Sarma) म्हणाले, आसामला देशातील अग्रगण्य राज्यांपैकी एक बनवण्याच्या निर्धाराने आम्ही विधानसभा निवडणुकीपूर्वी जनतेला वचने दिली होती. सत्ता राखल्यानंतर पहिल्या सहा महिन्यांच्या आतच आमच्या सरकारने ती अमलात आणण्याचे काम सुरू केले आहे.

तरुणाई आणि महिला कल्याणाला प्राधान्ययुवा सक्षमीकरण हा सरकारचा मुख्य उद्देश असून, उद्योजकतेला आर्थिक सहाय्य देण्यासह विविध योजना याद्वारे राबवल्या जात आहेत, असे मुख्यमंत्र्यांनी नमूद केले. तसेच महिला कल्याण हे आणखी एक महत्त्वाचे क्षेत्र असून त्यासाठी अरुंदोई योजनेसारखे अनेक कार्यक्रम राबवले जात असल्याचे त्यांनी सांगितले.

केवळ कल्याणकारी योजनाच नव्हे, तर राज्यात मोठ्या प्रमाणावर गुंतवणूक येत असून नागावलाही त्याचा लाभ मिळत असल्याचे ते म्हणाले. जनतेला दिलेली सर्व वचने प्रशासन पूर्ण करेल, असा विश्वास त्यांनी व्यक्त केला. सरकारची उत्तम कामगिरी आणि जनतेच्या आशीर्वादामुळे आगामी विधानसभा निवडणुकीत भाजप सलग चौथ्यांदा सत्तेत येईल, असा विश्वास त्यांनी (Himanta Biswa Sarma) बोलून दाखवला.