Satara: जिल्ह्यात सुरु असलेल्या मुसळधार पावसाने जनजीवन विस्कळीत केले असून सोमवारी अनेक ठिकाणी रस्ते खचणे, दरडी कोसळणे, घरांच्या भिंती पडणे, शाळेचे पत्रे उडणे आणि गोठा कोसळण्याच्या घटना घडल्या. प्रशासनाने तातडीने पंचनामे सुरू करण्याच्या सूचना दिल्या असून बंद झालेले मार्ग वाहतुकीसाठी पूर्ववत करण्याचे काम युद्धपातळीवर सुरू आहे.

कोयनानगर पोलीस ठाण्याच्या हद्दीतील पाबळनाला धबधबा परिसरात रस्ता खचल्याने कोयनानगर पोलीस ठाण्यासमोरील नवजा, कामरगाव व मानाईनगर या गावांकडे जाणारा मार्ग वाहतुकीसाठी बंद करण्यात आला आहे. सार्वजनिक बांधकाम विभागाला पर्यायी रस्ता तातडीने दुरुस्त करण्याच्या सूचना देण्यात आल्या आहेत. जावळी तालुक्यातील आलेवाडी गावाजवळ दरड कोसळल्याने मेढा- पाचवड मार्ग बंद झाला असून तो खुला करण्याचे काम सुरू आहे. अतिवृष्टीमुळे जावळी तालुक्यात विविध ठिकाणी वित्तहानी झाली. दरे बुद्रुक येथे तीन घरांच्या भिंती कोसळल्या, रेंडीमुरा येथे शाळेचे तीन पत्रे उडाले, तर महिगाव येथे गाईचा गोठा कोसळला आहे. संबंधित ग्राम महसूल अधिकाऱ्यांना पंचनामे करण्याच्या सूचना देण्यात आल्या आहेत.

जिल्ह्यात सोमवारी सरासरी ४६.६ मिलिमीटर पावसाची नोंद झाली. यामध्ये महाबळेश्वर येथे सर्वाधिक २१६.८ मिलिमीटर तर जावळी मेढा येथे ११४.५ मिलिमीटर पाऊस झाला. आतापर्यंत जिल्ह्यात सरासरी २०७.९ मिलिमीटर पाऊस नोंदविण्यात आला आहे. अनावश्यक प्रवास टाळण्याचे, घाटमाथा व दरडप्रवण भागात विशेष दक्षता घेण्याचे आवाहन
प्रशासनाने नागरिकांना केले आहे.