Satara: कोयना धरणाच्या पाणलोट क्षेत्रात सुरु असलेल्या संततधार पावसामुळे धरणातील पाणीसाठा झपाट्याने वाढत असून धरणाने ३५ टक्क्यांचा टप्पा पार केला आहे.
आज दि. ७ रोजी सायंकाळी ५ वाजता घेतलेल्या अहवालानुसार कोयना धरणाची पाणीपातळी २०९० फूट ११ इंच (६३७.३११ मीटर) इतकी झाली आहे. धरणातील एकूण पाणीसाठा ३८.१२ टीएमसी (३६.२२ टक्के) इतका नोंदविण्यात आला आहे.

कालच्या ३०.६७ टीएमसीच्या तुलनेत अवघ्या २४ तासांत ७.४५ टीएमसीने मोठी वाढ झाली आहे. धरणातील उपयुक्त (लाईव्ह) पाणीसाठा ३३ टीएमसी (३२.९५ टक्के) इतका झाला असून साठ्यातील ही वाढ दिलासादायक मानली जात आहे. पाणलोट क्षेत्रातील पावसाचा जोर कायम असल्याने आगामी काळात साठ्यात आणखी वाढ होण्याची शक्यता वर्तवली जात आहे.

पावसाची नोंदही समाधानकारक झाली आहे. कंसात एकूण पाऊस कोयना येथे ४५ मिलिमीटर (१३५९ मिलिमीटर), नवजा येथे ५२ मिलिमीटर (१६०६ मिलिमीटर) तर महाबळेश्वर येथे ६० मिलिमीटर (१९८४ मिलिमीटर)असी नोंद झाली आहे. धरणात येणारा पाण्याचा प्रवाह ८६,३११ क्युसेक इतका असून सध्या कोणताही विसर्ग करण्यात आलेला नाही. त्यामुळे धरणातील पाणी साठवून ठेवण्यावर भर देण्यात येत आहे.