गुवाहाटी : गेल्या तीन दिवसांत पूर्वोत्तर भारतात जोरदार पावसाने आणि भूस्खलनाने हाहाकार माजवला आहे. मणिपुर, मिझोराम, आसाम, अरुणाचल प्रदेश आणि त्रिपुरा या राज्यांत पूर, भुस्खलनामुळे 19 जणांचा मृत्यू झाला असून, 12 हजारांहून अधिक कुटुंबे प्रभावित झाली आहेत. अनेक ठिकाणी घरे कोसळली, नद्यांचे पाणी धोक्याच्या पातळीवर आहे. हवामान खात्याने सर्व राज्यांसाठी रेड अलर्ट जारी केला आहे.

मिझोराममध्ये भूस्खलनाने पाच घरे, हॉटेल उद्ध्वस्त –

मिझोरामच्या लॉन्गतलाई शहरात भूस्खलनामुळे पाच घरे आणि एक हॉटेल कोसळले. अनेकजण ढिगाऱ्याखाली अडकले असून, यंग लाई असोसिएशन, राज्य आपत्ती प्रतिसाद दल आणि तिसऱ्या भारतीय राखीव बटालियनच्या जवानांकडून बचावकार्य सुरू आहे. भूस्खलनामुळे राष्ट्रीय महामार्ग-54 बंद झाला, ज्यामुळे लॉन्गतलाई आणि सियाहा यांच्यातील संपर्क तुटला आहे.

आसाममध्ये पाच जणांचा बळी-

आसामच्या कामरूप मेट्रो जिल्ह्यात भूस्खलनात पाच जणांचा मृत्यू झाला. गुवाहाटी, सिलचरसह पाच जिल्ह्यांमध्ये 12,000 हून अधिक लोक पुराने प्रभावित झाले. लखीमपूरमध्ये रिंग बांध फुटला. गेल्या 24 तासांत गुवाहाटीत 90 ते 134 मिमी पाऊस पडला असून, पुढील काही दिवस भारी पावसाचा अंदाज आहे.

अरुणाचलमध्ये नऊ जणांचा मृत्यू –
अरुणाचल प्रदेशात भूस्खलनाने नऊ जणांचा बळी घेतला. पूर्व कामेंग जिल्ह्यात बाना-सेप्पा मार्गावर सात, तर लोअर सुबनसिरीत दोन मजुरांचा मृत्यू झाला. सिगिन नदी उफानावर आहे. हवामान खात्याने 1 ते 5 जूनपर्यंत जोरदार पावसाचा इशारा दिला आहे.

त्रिपुरात 106 घरे उद्ध्वस्त –
त्रिपुरात एका व्यक्तीचा पाण्यात बुडून मृत्यू झाला. 106 घरे उद्ध्वस्त झाली, 200 हून अधिक लोक बेघर झाले. हावड़ा नदीचा जलस्तर 10.01 मीटरपर्यंत वाढला.

मणिपुरात नद्या धोक्याच्या पातळीवर –
मणिपुरात नम्बुल, इरिल आणि इम्फाल नद्यांचा जलस्तर वाढला. टेंग्नौपाल, उखरुल, सेनापती येथे सर्वाधिक पाऊस नोंदवला गेला. हवामान खात्याने रेड अलर्ट जारी केला आहे.