मुंबई : राज्यात मागील काही दिवसांपासून पावसाने चांगलीच दडी मारली आहे. काही ठिकाणी सोडला तर कुठेच पाऊस नसल्याचे पाहायला मिळत आहे. त्यामुळे राज्यात बिकट परिस्थिती निर्माण झाली आहे. राज्यात १ जून ते २६ ऑगस्ट या काळात सरासरी ७७२.४ मिमी पाऊस पडतो. प्रत्यक्षात ७०९.५ मिमी म्हणजे सरासरीपेक्षा आठ मिमी कमी पाऊस झाला आहे.

राज्यात विभागनिहाय विचार करता मध्य महाराष्ट्रात सरासरीपेक्षा २१ टक्के कमी, मराठवाडय़ात सरासरीपेक्षा १८ टक्के कमी, विदर्भात सरासरीपेक्षा ९ टक्के कमी पावसाची नोंद झाली आहे. सांगली आणि जालन्यात अत्यल्प पावसामुळे भीषण स्थिती निर्माण झाली आहे.

भारतीय हवामान विभागाने पावसाविषयी माहिती दिली आहे. त्यानुसार, मध्य महाराष्ट्रात ५६० मिमी सरासरी पाऊस पडतो. प्रत्यक्षात २१ टक्के कमी ४४४.३ मिमी पाऊस झाला आहे. मध्य महाराष्ट्रातील सर्वच जिल्ह्यांत सरासरीपेक्षा कमी पाऊस झाला आहे. नगरमध्ये ३४ टक्के, धुळय़ात २३ टक्के, जळगावात १४ टक्के, कोल्हापुरात १४ टक्के, नंदुरबारमध्ये २१ टक्के, नाशिकमध्ये ९ टक्के, पुण्यात १७ टक्के, सांगलीत ४५ टक्के, साताऱ्यात ३६ टक्के आणि सोलापुरात २७ टक्के कमी पावसाची नोंद झाली आहे.

मराठवाडय़ात सरासरीपेक्षा १८ टक्के कमी पाऊस झाला आहे. ४५१.७ सरासरी पाऊस पडतो, प्रत्यक्षात ३७२.३ मिमी पाऊस झाला आहे. मराठवाडय़ातील नांदेड वगळता सर्वच जिल्ह्यांत सरासरीपेक्षा कमी पाऊस झाला आहे. औरंगाबादमध्ये ३३ टक्के, बीडमध्ये ३२ टक्के, हिंगोलीत ३४ टक्के, जालन्यात ४८ टक्के, लातूर ८ टक्के, उस्मानाबाद २३ टक्के आणि परभणीत २५ टक्के कमी पाऊस झाला आहे.

विदर्भात सरासरीपेक्षा नऊ टक्के कमी पाऊस झाला आहे. सरासरी ७३७ मिमी पाऊस पडतो, प्रत्यक्षात ६७२.७ मिमी पाऊस झाला आहे. अकोल्यात ३० टक्के, अमरावतीत ३३ टक्के, बुलडाण्यात २२ टक्के, चंद्रपुरात ४ टक्के, गोंदियात १७ टक्के, नागपुरात ६ टक्के, वध्र्यात १० टक्के आणि वाशिम १७ टक्के कमी पावसाची नोंद झाली आहे.

राज्यात सरासरी पेक्षा सर्वात कमी पावसाची नोंद सांगली आणि जालना जिल्ह्यात झाली आहे. या दोन्ही जिल्ह्यांत दुष्काळजन्य स्थिती निर्माण झाली आहे. सांगलीत सरासरी पेक्षा ४५ टक्के कमी पाऊस झाला आहे. जिल्ह्यात सरासरी ३३७.३ मिमी पाऊस होतो, प्रत्यक्षात १८५ मिमी पाऊस झाला आहे. जालन्यात सरासरी पेक्षा ४८ टक्के कमी पाऊस झाला आहे. ४२२ मिमी सरासरी पाऊस पडतो, प्रत्यक्षात २१९.७ मिमी पावसाची नोंद झाली आहे. खरिपातील पिके धोक्यात आली आहेत. जनावरांच्या चाऱ्याची, पिण्याच्या पाण्याची मोठी टंचाई निर्माण झाली आहे.