Heavy Rain Alert: २४ तासांत २४९ मिमी पाऊस! घाटमाथ्यावर ढगफुटीसदृश परिस्थिती, ताम्हिणी घाटात काय अवस्था?
Heavy Rain Alert: पुढील ४८ तास अत्यंत महत्त्वाचे, घाटमाथ्यावर 'ऑरेंज अलर्ट' जारी; पर्यटकांना काळजी घेण्याचे जिल्हा प्रशासनाचे आवाहन.
Heavy Rain Alert – शहर आणि उपनगरांच्या तुलनेत जिल्ह्याच्या घाटमाथा परिसरात मुसळधार पावसाने धुमाकूळ घातला आहे. मान्सूनचे आगमन झाल्यानंतर काही दिवस दडी मारून बसलेला पाऊस मागील चार ते पाच दिवसांपासून घाटमाथ्यावर जोरदार सक्रिय झाला आहे. गेल्या २४ तासांत रायगड व पुण्याच्या सीमेवरील भिरा घाटमाथ्यावर तब्बल २४९ मिलिमीटर म्हणजेच ढगफुटीसदृश पावसाची नोंद झाली,
तर ताम्हिणी घाट परिसरात १४० मिमी पावसाची नोंद झाली. यामुळे नदी-नाल्यांच्या पाणीपातळीत झपाट्याने वाढ होत आहे. घाटमाथा परिसरात सलग २४ तासांत १०० मिलीमीटरपेक्षा अधिक पाऊस पडत असल्यामुळे डोंगरमाथ्यावरून फेसाळणारे धबधबे कोसळू लागले आहेत. ताम्हिणी, भिरा आणि डुंगरवाडी परिसरात झालेल्या या मुसळधार पावसामुळे पर्यटकांचे आकर्षण असलेले धबधबे पूर्ण वेगाने सुरू झाले असून, डोंगरमाथा हिरवाईने नटू लागला आहे.
मात्र, या अतिवृष्टीमुळे घाटरस्त्यांवर दाट धुके पसरले असून, रस्ते निसरडे झाले आहेत. परिणामी घाटांमधील वाहतुकीचा वेग मंदावला आहे. पुढील ४८ तास घाटमाथ्यावर पवसाचा ऑरेंज अलर्ट दिला आहे. मुसळधार पावसामुळे घाटांमध्ये दरडी कोसळण्याचा संभाव्य धोका लक्षात घेता, जिल्हा प्रशासनाने पर्यटकांना आणि स्थानिक नागरिकांना घाटांमधून प्रवास करताना विशेष काळजी घेण्याचे आवाहन केले आहे.
पावसाची आकडेवारी मिलिमीटरमध्ये
भिरा २४९, डुंगरवाडी १४०, ताम्हिणी १२०, धारावी आणि शिरगाव ११०, दावडी ९२, लोणावळा ७४, वळवण ५६.
