नवी दिल्ली – देशात उष्णतेची लाट कायम आहे. शनिवारी, हरियाणा, दिल्ली, उत्तर प्रदेश, मध्य प्रदेश, बिहार, गुजरात या 6 राज्यांमध्ये 35 ठिकाणी तापमान 42 अंशांपेक्षा जास्त नोंदवले गेले. उत्तर प्रदेशातील प्रयागराज हे 45.2 अंश तापमानासह देशातील सर्वात उष्ण ठरले.

पुढील ४ दिवस उत्तर प्रदेश, हिमाचल प्रदेश, पंजाब, मध्य प्रदेश, पश्चिम बंगाल, बिहार, झारखंड आणि ओडिशाच्या काही ठिकाणी उष्णतेची लाट येण्याचा इशारा देण्‍यात आला आहे. जम्मू-काश्मीर, लडाख, हिमाचल प्रदेश, उत्तराखंड, पंजाब, हरियाणा, चंदीगड, दिल्ली, उत्तर प्रदेशमध्ये येत्या पाच दिवसांत तापमानात ३ ते ५ अंशांनी वाढ होऊ शकते.

मान्सूनने शनिवारी (8 जून) छत्तीसगड आणि ओडिशामध्ये प्रवेश केला. राजस्थानच्या बाडमेर, जैसलमेर, चित्तोडगड आणि उदयपूरमध्ये जोरदार पाऊस झाला. जैसलमेरच्या रामगडमध्येही गारा पडल्या. राज्यातील 12 जिल्ह्यांमध्ये वादळी वाऱ्यासह पावसाचा इशारा देण्यात आला आहे. काही जिल्ह्यांमध्ये 9, 10 आणि 11 जून रोजी असेच हवामान अपेक्षित आहे.

हवामान खात्याने सांगितले की, 11 आणि 12 जून रोजी गुजरातमधील अनेक जिल्ह्यांमध्ये पाऊस आणि मेघगर्जनेची शक्यता आहे. या काळात वाऱ्याचा वेग ताशी ३० ते ४० किलोमीटर राहील. गुजरातमध्ये मान्सूनची निश्चित तारीख १५ जून आहे. मात्र, ते वेळेपूर्वी गुजरातमध्ये दाखल होण्याची शक्यता आहे.