लखनऊ : देशातील कोरोनाच्या दुसऱ्या लाटेने सर्व राज्यांना मोठा फटका बसला आहे. त्यात महाराष्ट्र आणि उत्तर प्रदेश राज्ये आघाडीवर असल्याचे दिसत आहे. दरम्यान. उत्तर प्रदेशात कोरोना विषाणूंच्या रुग्णांच्या संख्येसह मृत्यूच्या आकडेतही मोठी वाढ होताना दिसत आहे.या अशा वातावरणात मनाला चटका लावणारी एक घटना उत्तर प्रदेशात घडली आहे.

उत्तर प्रदेशची राजधानी लखनऊच्या कृष्णानगरच्या एलडीए कॉलनीच्या सेक्टर सी -1 मधील एका घरात होम क्वारंटाईनमध्ये असलेल्या 65 वर्षीय पिता अरविंद गोयल आणि 25 वर्षीय मुलगा इलू गोयल यांचा मृत्यू झाला आहे. मिळालेल्या माहितीनुसार जेव्हा शेजार्‍यांना घरातून वास आला, तेव्हा कळालं की घरात मृत्यू झाली आहे. शेजार्‍यांनी पोलिसांना याबाबत माहिती दिली. पोलीस तिथे पोहोचल्यानंतर रहिवाशांनी बंदिस्त घराचे लॉक असणारा दरवाजा तोडावा लागला. लोखंडी गेट उघडल्यानंतर आत दोन मृतदेह आढळले. तर 60 वर्षांची पत्नी रंजना गोयल खूपच गंभीर दिसत होत्या. त्यांची प्रकृतीही खूपच वाईट होती आणि त्यांना श्वास घेण्यास त्रास होत होता.

कोरोनाचा संसर्ग झाल्यानंतर तिघेही जण घरीच राहून उपचार घेत होते. अपंग असल्यामुळे महिला चालू शकत नव्हती. नवरा आणि मुलाच्या मृत्यूनंतर ती मोठ्याने ओरडली, पण तिचा आवाज घराबाहेर आला नाही. पोलिसांनी वडील-मुलाचा मृतदेह शवविच्छेदनासाठी पाठविला आहे, तर महिलेला उपचारासाठी लोकबंधू रुग्णालयात पाठविण्यात आले आहे. शेजाऱ्यांनी दिलेल्या माहितीनुसार, 4 दिवसांपूर्वी अरविंद गोयल हे घराच्या आत फिरताना दिसले होते, परंतु त्यानंतर ते दिसले नाहीत. कोरोनाच्या भीतीने, संपूर्ण परिसर ओसाड पडला आहे, ज्यामुळे कोणाचंही लक्ष त्यांच्याकडे गेलं नाही. कृष्णनगरचे पोलीस निरीक्षक म्हणाले की, त्यांच्या कुटुंबातील अन्य सदस्यांविषयी कोणतीही माहिती नाही. अशा परिस्थितीत पोलिसांनी पिता आणि मुलाच्या अंत्यसंस्काराची प्रक्रिया सुरु केली आहे. त्याचवेळी महिलेला उपचारासाठी रुग्णालयात दाखल करण्यात आले आहे.

कृष्णा नगरातील सेक्टर डी-1 मधील एका घराच्या आत आणखी एक मृतदेह सापडला. विवेक शर्मा असे मृताचे नाव आहे. शेजार्‍यांच्या म्हणण्यानुसार, विवेकलाही कोरोनाचा संसर्ग होता आणि त्याने स्वत: ला विलगीकरणात ठेवले होते. शेजार्‍यांनी विवेक शर्माच्या मृत्यूची माहिती कुशी नगरात राहणाऱ्या विवेकच्या नातेवाईकाला दिली होती. त्यानंतर त्या नातेवाईकाने पोलिस नियंत्रण कक्षामध्ये विवेक शर्माच्या मृत्यूची माहिती दिली. घटनास्थळी पोलिसांसह पालिकेची टीम बोलविण्यात आली आहे. महापालिकेच्या पथकाने तेथून मृतदेह अंत्यसंस्कारांसाठी पाठविला आहे. कृष्णा नगर पोलिसांनी माहिती देताना सांगितले की, विवेकची बहीण बनारस येथे राहते आणि एक भाऊ कोलकाता येथे राहतो. दोघांनाही माहिती देण्यात आली आहे.