Health Tips : अचानक घसा दुखायला लागला, खोकल्याची ढास आली, कफ झाला किंवा पोटदुखीने हैराण झालात, तर लगेच औषधांच्या गोळ्या घेण्याआधी घरातच असलेल्या काही साध्या पदार्थांची आठवण होऊ शकते.

आपल्या स्वयंपाकघरात सहज उपलब्ध असलेली हळद, दूध, लवंग, वेलदोडा, ओवा, साखर, तीळ आणि विड्याची पानं यांचा पारंपरिक पद्धतीने वापर करून किरकोळ त्रासात आराम मिळवण्याचे अनेक घरगुती उपाय सांगितले जातात.

विशेष म्हणजे, आजी-आईच्या काळापासून वापरात असलेले हे उपाय अजूनही अनेक घरांमध्ये आवर्जून केले जातात. मात्र, कोणता उपाय कोणत्या त्रासासाठी केला जातो आणि तो नेमका कसा करायचा, हे जाणून घेणंही तितकंच महत्त्वाचं आहे.

प्रत्येक व्यक्तीच्या फायद्याच्या काही गोष्टी :

घसा दुखत आहे ?

दूध , हळद व साखर याचे गरमागरम मिश्रण पिण्याने घसादुखी कमी होते, लवंग चघळण्यानेही घसादुखी कमी होते.

घसा खवखवणे  :

बरेच वेळा खवखवण्याचा त्रास आपल्याला होतो. अशावेळी घसा खवखवत असल्यास खडी साखर आणि चिमूटभर कात (विडे करताना घालतात तो ) जिभेवर ठेवून चघळावा. त्याने खूपच आराम पडतो. खोकल्याची ढास येत असल्यास- आख्खा सालासकट वेलदोडा गालात धरावा. अथवा कात व साखर मिश्रण चघळावे.

कफ :

कफ झाला असल्यास विडयाची पाने ठेचून रस काढावा व मधाबरोबर चाटावा. छाती, पाठ शेकण्यानेही कफ सूटून येतो.

तोंड येणे, तोंडात पुरळ :

तोंड येण्यामुळे जीभेवर फोड येतात तसेच तिखट अजिबात जिभेला लागू देत नाही. जीभ लालभडक होते. अशा वेळी दोन दिवस आहारात फक्त द्रव पदार्थ घ्यावेत. फळांचे रस, दूध, ताक, सरबत यांसारखे पदार्थ घ्यावेत.

तोंड येण्या मागे बिघडलेले पचन हे मुख्य कारण असते. आणि पोटाला दोन दिवस आराम दिला की पोट मूळपदावर येते आणि जिभेला आलेली लाली व पुरळ कमी होण्यासही मदत मिळते.

घशात जळजळ, घसा बसणे :

वेलदोडा दाणे व साखर एकत्र चघळणे. बसलेल्या घशावर कोमट केलेल्या मिठाच्या पाण्याच्या गुळण्या करण्यानेही घसा दुखणे, बसणे याला उतार पडतो.

पाय दुखणे :

मध्यमवयाच्या महिला, अशक्त मुले आणि मुली तसेच सरसकटसगळे वृद्ध यांना पायदुखीचा त्रास बरेचदा होताना आपण पाहातो. यावर पाव चमचा कच्चे तीळ चावून खावेत. महिनाभर हा उपाय केल्याने पाय दुखणे थांबते.

पोटदुखी :

ओवा व साखर गरम पाण्याबरोबर घेण्याने पोटदुखी कमी होते. लहान बाळांमधील पोटदुखी पोट शेकण्यानेही कमी होते. अगदी तान्हे बाळ असेल तर आईने ओवा चावून बाळाच्या बेंबीवर तोंडानेच वाफारा सोडला तरी पोटदुखी कमी होते. मात्र गॅसेसमुळे बाळाचे पोट दुखत असेल तर हिंग पाण्यात कालवून त्याचा लेप बेंबीभोवती दिल्याने आराम पडतो.