नगर, (प्रतिनिधी) – अहमदनगर मर्चंटस्‌‍ को ऑप. बँकेच्या सुवर्णमहोत्सवी वर्षाचा समारोप सोहळा सोमवार (दि.२६) रोजी दुपारी केंद्रीय दळणवळण मंत्री नितीन गडकरी यांच्या प्रमुख उपस्थितीत होणार आहे. केशरगुलाब मंगल कार्यालयात आयोजित या सोहळ्याच्या अध्यक्षस्थानी जिल्ह्याचे पालकमंत्री राधाकृष्ण विखे पाटील असणार आहेत. याच कार्यक्रमात सहकारी बँकिंग क्षेत्रातील ५६ वर्षांच्या योगदानाबद्दल बँकेचे संस्थापक तथा विद्यमान अध्यक्ष हस्तीमलजी मुनोत यांचा सहकारयात्री उपाधीने गौरव करण्यात येणार आहे, अशी माहिती बँकेच्या सुवर्णमहोत्सवी वर्ष समितीचे अध्यक्ष तथा ज्येष्ठ संचालक अनिल पोखरणा यांनी दिली.

अनिल पोखरणा म्हणाले, अहमदनगर मर्चंटस्‌‍ बँकेची ५० वर्षांची वाटचाल अनेक अर्थांनी महत्वपूर्ण आहे. हस्तीमलजी मुनोत यांनी आपल्या तत्कालिन सहकाऱ्यांसह दूरदृष्टीने बँकेची मुहूर्तमेढ रोवली. शिस्तबध्द व काटकसरीने कारभार करून बँकेने व्यापार, व्यवसायाला पाठबळ देत अर्थकारणाला चालना देण्याचे काम केले आहे. बँकेचा सुवर्णमहोत्सव साजरा करताना वर्षभर ग्राहक, सभासद, ठेवीदार, खातेदारांसाठी तसेच कर्मचाऱ्यांसाठीही विविध कार्यक्रम घेण्यात आले. आता या वर्षाची सांगता करताना अध्यक्ष हस्तीमलजी मुनोत यांचाही ना.नितीन गडकरी यांच्या हस्ते ‘सहकारयात्री’ उपाधीने गौरव करून होणार आहे.

या कार्यक्रमास राज्याचे सहकारमंत्री दिलीप वळसे पाटील, राष्ट्रीय सहकारी साखर कारखाना महासंघाचे अध्यक्ष हर्षवर्धन पाटील, राज्याचे सहकार आयुक्त व निबंधक सहकारी संस्थेचे सौरभ राव, खा.डॉ.सुजय विखे, आ.संग्राम जगताप, माजी मंत्री आ.प्रा.राम शिंदे, माजी मंत्री तथा जिल्हा बँकेचे अध्यक्ष शिवाजीराव कर्डिले, भाजपचे शहर जिल्हाध्यक्ष ॲड.अभय आगरकर, जिल्हा सरचिटणीस सचिन पारखी आदी मान्यवरांची प्रमुख उपस्थिती राहिल.

या कार्यक्रमात बँकेच्या ५० वर्षांच्या वाटचालीचा आढावा घेतानाच भविष्यातील घोडदौडीचा वेध घेतला जाणार आहे. या वाटचालीत बंॅकेने अनेक माईलस्टोन गाठले आहेत. मर्चंटस्‌‍ बँक जिथे लक्ष्मी वास करे तिथे हा विश्वास आतापर्यंतच्या वाटचालीत बँकेशी निगडीत सर्व घटकांना आला आहे. हाच विश्वास कायम जपत भविष्यात आणखी मोठी भरारी घेण्याची जिद्द बँकेने ठेवली आहे. या कार्यक्रमास सभासद, ग्राहक, खातेदार, ठेवीदारांनी आवर्जून उपस्थित राहण्याचे आवाहन संचालक मंडळा तसेच मुख्य कार्यकारी अधिकारी सुनिल पुराणिक यांनी केले आहे.