Bank Holidays in September – सप्टेंबर महिन्यात बँकेशी संबंधित महत्त्वाचे काम असेल तर ग्राहकांनी आधीच नियोजन करणे गरजेचे आहे. बँक कर्मचाऱ्यांच्या UFBU संघटनेने विविध मागण्यांसाठी सप्टेंबरमध्ये देशव्यापी संपाची घोषणा केली आहे.

UFBUच्या कार्यक्रमानुसार ११ सप्टेंबरला एक दिवसाचा, तर २८, २९ आणि ३० सप्टेंबरला सलग तीन दिवसांचा संप होणार आहे. पाच दिवसांचा बँकिंग आठवडा लागू करणे, तसेच परफॉर्मन्स लिंक्ड इन्सेंटिव्हच्या नियमांबाबत संघटनांच्या मागण्या आहेत.

याशिवाय सप्टेंबरमध्ये रविवार आणि दुसरा-चौथा शनिवार यामुळे नियमित सुट्ट्या आहेत. ४ सप्टेंबरला जन्माष्टमी आणि १४ सप्टेंबरला गणेश चतुर्थीची सुट्टी काही राज्यांमध्ये आहे. त्यामुळे बँक सुट्ट्यांची संख्या प्रत्येक राज्यात वेगवेगळी असेल.

संपाच्या काळात बँक शाखांमधील प्रत्यक्ष व्यवहारांवर परिणाम होऊ शकतो. मात्र UPI, इंटरनेट बँकिंग, मोबाईल बँकिंग आणि ATM सेवा सामान्यतः सुरू राहण्याची शक्यता आहे. त्यामुळे चेक, रोख रक्कम किंवा शाखेत करायची महत्त्वाची कामे असल्यास ती संपाच्या तारखांपूर्वी पूर्ण करणे सोयीचे ठरेल.

साप्ताहिक सुट्ट्यांची यादी

६ सप्टेंबर: रविवार
१२ सप्टेंबर: दुसरा शनिवार
१३ सप्टेंबर: रविवार
२० सप्टेंबर: रविवार
२६ सप्टेंबर: चौथा शनिवार
२७ सप्टेंबर: रविवार

सण-उत्सवांच्या सुट्ट्या

४ सप्टेंबर: श्रीकृष्ण जन्माष्टमीनिमित्त देशातील बहुतांश राज्यांमध्ये बँका बंद राहतील.
१४ सप्टेंबर: गणेश चतुर्थी, विनायक चतुर्थी आणि हरतालिका या सणांमुळे विविध राज्यांमधील स्थानिक नियमांनुसार बँकांना सुट्टी असेल.