Diwali Bonus : दिवाळीच्या पार्श्वभूमीवर हरियाणातील पंचकुला येथील एका औषध कंपनीने आपल्या चार कर्मचाऱ्यांना अनोखी भेट दिली आहे. MITS Healthcare या कंपनीने चार कर्मचाऱ्यांना नवीन Kia Sonet SUV कार भेट म्हणून दिल्या आहेत. कर्मचाऱ्यांच्या मेहनती, चांगल्या कामगिरी आणि कंपनीप्रती असलेल्या निष्ठेचा गौरव म्हणून हा निर्णय घेण्यात आला. या कार भेटीचे फोटो आणि व्हिडिओ सोशल मीडियावर व्हायरल झाले आहेत.

MITS Group of Companiesचे संस्थापक आणि अध्यक्ष एम.के. भाटिया यांच्या हस्ते कर्मचाऱ्यांना या कार देण्यात आल्या. यावेळी चारही कार काळ्या कापडाने झाकण्यात आल्या होत्या. कर्मचाऱ्यांनी एकामागून एक कापड हटवून आपल्या नवीन कारचा खुलासा केला. यावेळी सहकाऱ्यांनी जल्लोष केला. ढोल-ताशांच्या गजरात केक कापून आणि नाचत हा आनंद साजरा करण्यात आला.

मिळालेल्या माहितीनुसार, कंपनीने कर्मचाऱ्यांच्या कामगिरीचा सन्मान करण्यासाठी हा उपक्रम राबवला आहे. यातील एका कर्मचाऱ्याने कंपनीत पाच वर्षे काम केल्यानंतर या पुरस्कारासाठी निवड झाल्याचे सांगितले आहे.

या कारसाठी कंपनीने सुरुवातीची रक्कम भरली असून, त्यानंतरचे मासिक हप्ते कर्मचाऱ्यांच्या पगारातून समायोजित केले जाणार आहेत. कारची नोंदणी मात्र संबंधित कर्मचाऱ्यांच्या नावावर करण्यात आली आहे.

कंपनीने १८ महिने पूर्ण केलेल्या पात्र कर्मचाऱ्यांसाठी लकी ड्रॉची योजनाही सुरू केली आहे. सुरक्षा रक्षकांपासून वरिष्ठ अधिकाऱ्यांपर्यंत विविध पदांवरील कर्मचारी या योजनेत सहभागी होऊ शकतात.

MITS Healthcareने यापूर्वीही कर्मचाऱ्यांना अशा प्रकारे वाहनांची भेट दिली आहे. २०२४ मध्ये कंपनीने १५ कर्मचाऱ्यांना Tata Punch आणि Maruti Suzuki Grand Vitaraसह कार भेट दिल्या होत्या. या उपक्रमामुळे कंपनीच्या कर्मचारी सन्मान धोरणाची सोशल मीडियावर चर्चा होत आहे.