Pakistan Terrorist : हरियाणातील सिरसा येथे गेल्या वर्षी महिला पोलीस ठाण्यावर झालेल्या ग्रेनेड हल्ला (Pakistan Terrorist) प्रकरणी राष्ट्रीय तपास यंत्रणेने (एनआयए) मंगळवारी मोठी कारवाई केली आहे.

या दहशतवादी हल्ल्याच्या (Pakistan Terrorist) कटात सामील असलेल्या दोन पाकिस्तानी नागरिकांसह नऊ जणांविरुद्ध एनआयएने पंचकुला येथील विशेष न्यायालयात दोषारोपपत्र दाखल केले आहे.

गतवर्षी २५ नोव्हेंबर २०२५ रोजी झालेल्या या हल्ल्यात सुदैवाने कोणतीही जीवितहानी झाली नव्हती. एनआयएच्या तपासानुसार, पाकिस्तानात बसलेला कुख्यात गुंड आणि दहशतवादी (Pakistan Terrorist) शहजाद भट्टी आणि सोहेल अहमद ऊर्फ सोहेल बलोच हे या हल्ल्याचे मुख्य सूत्रधार आहेत.

त्यांनी सोशल मीडिया आणि एन्क्रिप्टेड मेसेजिंग ॲप्सचा वापर करून भारतीय तरुणांची माथी भडकावली, त्यांचे वैचारिक ध्रुवीकरण केले आणि भारतात ऑपरेशनल मॉड्यूल्स तयार केले. भारतातील पोलीस ठाण्यांना लक्ष्य करून जनतेमध्ये दहशत निर्माण करणे हा या कटाचा मुख्य हेतू होता.

भारतातील या मॉड्यूल्सचे नेतृत्व धीरज नावाचा हस्तक करत होता. आरोपींनी आधी सिरसा महिला पोलीस ठाण्याची रेकी (पाहणी) केली. त्यानंतर अमृतसरला जाऊन गुरजंत सिंग नावाच्या व्यक्तीकडून ग्रेनेड मिळवला.

धक्कादायक बाब म्हणजे, दहशतवादाचा प्रसार करण्यासाठी आरोपींनी या ग्रेनेड हल्ल्याचे मोबाईलवर चित्रण (शूटिंग) केले होते आणि ते पाकिस्तानी हँडलर्सना पाठवले होते. एनआयए आता या प्रकरणातील आर्थिक गैरव्यवहार आणि फरार आरोपींचा शोध घेत आहे.