Haryana Assembly Election 2024 ।  Rahul Gandhi – हरियाणा विधानसभा निवडणुकीत आम आदमी पार्टीसोबत युती व्हावी अशी कॉंग्रेस नेते राहुल गांधी यांची इच्छा आहे. कॉंग्रेसच्या निवडणूक समितीच्या बैठकीत राहुल गांधी यांनी आपला हा विचार मांडला असून पक्षाच्या अन्य नेत्यांचे यावर काय मत आहे अशी विचारणा केली आहे. जरी राहुल यांची ही भूमिका असली तरी हरियाणातील कॉंग्रेस नेते मात्र सातत्याने आम आदमी पार्टीसोबत युती होण्याच्या शक्यतेचा इन्कार करत आहेत.

कॉंग्रेसच्या हरियाणातील खासदार आणि पक्षाच्या ज्येष्ठ नेत्या कुमारी शेलजा यांनी अलिकडेच एका मुलाखतीत आपसोबत युतीची शक्यता फेटाळून लावली आहे. कॉंग्रेसची राज्यातील स्थिती अत्यंत भक्कम आहे आणि पक्ष स्वबळावर लढण्यास सक्षम असल्याचे त्या म्हणाल्या होत्या.

दरम्यान, राज्यात आयएनएलडी आणि बहुजन समाज पक्ष यांच्यात आघाडी झाली आहे. तसेच जेजेपी आणि चंद्रशेखर आझाद यांच्या आझाद समाज पक्षाचीही युती झाली आहे. आम आदमी पक्षाकडून राज्यात जोरात प्रचार सुरू आहे.

दिल्लीचे मुख्यमंत्री अरविंद केजरीवाल यांच्या पत्नी सुनीता केजरीवाल स्वत: प्रचाराच्या मैदानात उतरल्या आहेत. अशी एकूण स्थिती असताना भारतीय जनता पार्टीच्या विरोधातील मतांची विभागणी होण्याची शक्यता व भीती कॉंग्रेसला वाटते आहे.

लोकसभा निवडणुकीत कॉंग्रेस आणि आपची युती झाली होती. कॉंग्रेसने आपला कुरूक्षेत्र ही जागा सोडली होती. मात्र त्यांना तेथे पराभव पत्करावा लागला. राज्यात कॉंग्रेस आणि भाजपला समान जागा मिळाल्या आहेत त्यामुळे कॉंग्रेसला हरियाणात सरकार स्थापन करण्याची संधी दिसू लागली आहे.

भाजपला पराभूत करण्यासाठी आपण एकत्र राहणे आवश्यक

राहुल गांधींच्या युतीच्या प्रश्नावर माजी मुख्यमंत्री भूपेंद्र सिंह हुड्डा म्हणाले, ‘आम आदमी पार्टी जास्त जागा मागत आहे. असो, आजच्या परिस्थितीत काँग्रेस 55 जागा सहज जिंकत आहे.

हुड्डा यांचे उत्तर ऐकून राहुल गांधी म्हणाले, ‘भाजपला पराभूत करण्यासाठी आपण एकत्र राहणे आवश्यक आहे. मी हरियाणात युती करण्याच्या सूचना देत नाही, पण एकदा चर्चा झाली की त्यांना सोबत घेता येते का ते पहा.’ असं राहुल गांधी यावेळी म्हणाले.

काय म्हणाले दीपक बाबरिया?

इंडिया आघाडी अंतर्गत, आम आदमी पक्षाने हरियाणातील लोकसभेच्या दहापैकी एक जागा लढवली होती, त्यामुळे काँग्रेससोबत युती करून त्यांना किमान 10 जागा हव्या आहेत. दोन्ही पक्ष मधला मार्ग कसा काढतात हे पाहायचे आहे. हरियाणा विधानसभा निवडणुकीत हा ट्रेंड सुरू झाला, तर पुढच्या वर्षी दिल्लीतही काँग्रेस-आप युती पाहायला मिळू शकते.

हरियाणा काँग्रेसचे प्रभारी दीपक बाबरिया यांनी सांगितले की, आम आदमी पार्टी आणि इंडिया आघाडीच्या इतर पक्षांशी युतीबाबत चर्चा सुरू आहे, वेळ आल्यावर संपूर्ण माहिती दिली जाईल. असं देखील त्यांनी यावेळी सांगितलं.