Harshwardhan Sapkal : कॉंग्रेस नेते राहुल गांधींवर टीका करणाऱ्या मुख्यमंत्री देवेंद्र फडणवीस यांच्यावर राज्याचे काँग्रेस अध्यक्ष हर्षवर्धन सपकाळ (Harshwardhan Sapkal) यांनी रविवारी निशाणा साधला. जर फडणवीस दुष्काळग्रस्त शेतकऱ्यांच्या समस्या सोडवू शकत नसतील, तर त्यांनी राजीनामा द्यावा आणि निवडणूक आयोगाचे प्रवक्ते म्हणून काम करावे, असा सल्ला दिला.

याआधी, फडणवीस यांनी विरोधी पक्षाचा मत चोरीचा आरोप फेटाळून लावला होता. तसेच, अराजकता आणि गोंधळ निर्माण करण्यासाठी राहुल गांधी निवडणूक आयोगासारख्या घटनात्मक संस्थांवरील लोकांचा विश्वास कमकुवत करण्याचा प्रयत्न करत असल्याचा आरोप त्यांनी (Harshwardhan Sapkal) केला होता.

निवडणूक आयोगांतर्गत मतभेद असल्याच्या वृत त्यांनी फेटाळून लावले. तसेच, एसआयआर प्रक्रियेबाबतचे निर्णय एकमताने घेण्यात आले होते, असे स्पष्टीकरण तिन्ही निवडणूक आयुक्तांनी संयुक्त निवेदनाद्वारे दिले असल्याचे त्यांनी ठामपणे सांगितले. फडणवीस हे निवडणूक आयोगाचे प्रवक्ते आहेत का? काँग्रेसने निवडणूक आयोगासमोर उपस्थित केलेल्या प्रश्नांची उत्तरे ते का देत आहेत? असा सवाल सपकाळ यांनी केला.

सपकाळ म्हणाले, मतदार याद्या आणि निवडणूक प्रक्रियेबाबत राहुल गांधींनी उपस्थित केलेल्या प्रश्नांमुळे निवडणूक प्रणालीतील पारदर्शकतेचा मुद्दा ऐरणीवर आला आहे. तथ्यांच्या आधारे प्रश्नांची उत्तरे देण्याऐवजी भाजप नेते राहुल गांधींवर वैयक्तिक टीका करत असल्याचा आरोप त्यांनी केला. फडणवीस यांच्या मतदारसंघात पाच महिन्यांत मतदारांच्या संख्येत झालेली वाढ याबद्दल राहुल गांधींनी केलेल्या दाव्याचा संदर्भ देत, मुख्यमंत्र्यांनी निवडणूक आयोगाचा बचाव करण्याऐवजी त्यांच्याकडूनच उत्तरे मागावीत, असे सपकाळ म्हणाले.

निवडणूक आयोगाच्या कामकाजाबाबत प्रश्न उपस्थित केले गेले असतील, तर आयोगानेच त्यांची उत्तरे दिली पाहिजेत. निवडणूक आयोगाचा बचाव करण्याऐवजी, मुख्यमंत्र्यांनी महाराष्ट्रातील जनतेशी संबंधित मुद्द्यांकडे लक्ष दिले पाहिजे, असे सपकाळ (Harshwardhan Sapkal) म्हणाले.