नवनीत राणा… हे नाव सध्या चर्चेत आले आहे. देशभर या नावाची चर्चा होत आहे. नवनीत अमरावतीच्या अपक्ष खासदार आहेत आणि त्यांचे पती रवी राणा हे बडनेराचे अपक्ष आमदार आहेत. दोघांनी शनिवारी महाराष्ट्राचे मुख्यमंत्री उद्धव ठाकरे यांचे निवासस्थान ‘मातोश्री’बाहेर हनुमान चालिसाचे पठण करण्याची घोषणा केली. येथूनच वादाला सुरुवात झाली.

नवनीत आणि त्यांचे पती रवी मातोश्रीवर पोहोचण्यापूर्वीच मोठ्या संख्येने शिवसैनिक त्यांच्या मुंबईतील घराबाहेर पोहोचले. संपूर्ण घराला घेराव घालून निषेध सुरू केला. नवनीत या साऊथ चित्रपटातील अभिनेत्रीही आहेत. त्यांनी अनेक पंजाबी चित्रपटांमध्येही काम केले आहे. चला जाणून घेऊया नवनीत यांच्याबद्दल…

आधी जाणून घ्या संपूर्ण प्रकरण ?
मार्चच्या अखेरीस हे प्रकरण सुरू झाले. अजानमुळे होणार्‍या ध्वनिप्रदूषणाची तक्रार करत भाजपने मुंबईच्या पोलिस आयुक्तांना निवेदन दिले. 5 एप्रिल रोजी मुंबईतील भाजप नेते मोहित कंबोज यांनी मंदिरांमध्ये हनुमान चालीसा वाजवण्यासाठी मोफत लाऊडस्पीकर देण्याची घोषणा केली. दुसरीकडे, मनसे प्रमुख राज ठाकरे यांनी सरकारला 3 मे पर्यंत मशिदींवरील लाऊडस्पीकर हटवण्याचा अल्टिमेटम दिला आहे. मनसे कार्यकर्त्यांनी ठिकठिकाणी लाऊडस्पीकर लावून हनुमान चालिसाचे पठण सुरू केले.

दरम्यान, या संपूर्ण वादात अपक्ष आमदार रवी राणा आणि त्यांच्या खासदार पत्नी नवनीत कौर राणा यांनीही उडी घेतली आहे. अमरावतीच्या खासदार नवनीत राणा यांनी त्यांच्या परिसरात हनुमान चालिसा पठण केले. यावेळी शेकडो महिलाही त्यांच्यासोबत होत्या. रवी राणा म्हणाले की, हनुमान जयंतीच्या दिवशी ते आणि त्यांची पत्नी मंदिरात जाऊन हनुमान चालिसाचे पठण करतील. ज्या मंदिरांमध्ये लाऊडस्पीकर नाहीत, तेथे आम्ही लाऊडस्पीकरचे मोफत वाटप करू. तसेच दोन दिवसांपूर्वी या दोघांनी 23 एप्रिलला म्हणजेच शनिवारी मुख्यमंत्री उद्धव यांच्या घरी हनुमान चालीसाचे पठण करण्याची घोषणा केली होती.

या घोषणेनंतर शिवसैनिकही सक्रिय झाले. शनिवारी सकाळी शिवसैनिक नवनीत राणा यांच्या मुंबईतील घरी पोहोचले. शिवसैनिकांच्या गदारोळावर नवनीत राणा म्हणाल्या, ‘महाराष्ट्राच्या मुख्यमंत्र्यांनी शिवसेना कार्यकर्त्यांना आम्हाला त्रास देण्याचे आदेश दिले. ते शिवसेनेचे कार्यकर्ते बॅरिकेड्स तोडत आहेत. मी पुन्हा पुन्हा सांगते की मी ‘मातोश्री’च्या बाहेर हनुमान चालिसाचा पाठ करेन. मुख्यमंत्री फक्त लोकांना तुरुंगात टाकायचे काम जाणतात. मात्र, उद्या पंतप्रधान नरेंद्र मोदी यांचा मुंबई दौरा आहे. त्यामुळे काही वाद नको म्हणत, नवनीत राणा यांनी मातोश्रीसमोर जाऊन हनुमान चालिसा पठण करण्याचे रद्द केले आहे. त्यामुळे आता हा वाद निवळताना दिसत आहे.

आता जाणून घेऊया कोण आहेत नवनीत राणा?
अमरावती येथील अपक्ष खासदार नवनीत राणा 36 वर्षांच्या आहेत. त्यांचा जन्म 3 जानेवारी 1986 रोजी मुंबईत झाला. नवनीत मूळची पंजाबची आहे. त्यांचे वडील भारतीय सैन्यात होते. बारावीनंतर नवनीतने शिक्षण सोडून अभिनयाला सुरुवात केली. तसेच मॉडेल म्हणूनही त्यांनी काम केले. यानंतर त्यांनी म्युझिक व्हिडिओमध्ये नशीब आजमावले. येथून त्यांनी फिल्म इंडस्ट्रीत ठसा उमटवायला सुरुवात केली. ‘दर्शन’ या कन्नड चित्रपटातून पदार्पण केले. यानंतर त्यांनी दक्षिण भारतातील अनेक चित्रपटांमध्येही काम केले. त्या रिअॅलिटी शोमध्येही दिसल्या आहेत.

लग्नानंतर सुरू झाला राजकीय प्रवास –
2011 मध्ये नवनीत यांनी अमरावतीतील बडनेरा मतदारसंघातील अपक्ष आमदार रवी राणा यांच्याशी लग्न केले. योगगुरू बाबा रामदेव यांच्या आश्रमात दोघांची भेट झाल्याचे सांगितले जाते. दोघेही बाबा रामदेव यांचे भक्त आहेत. लग्नानंतर नवनीत यांनी राजकारणात प्रवेश केला. 2014 मध्ये नवनीत यांनी राष्ट्रवादीच्या तिकिटावर लोकसभा निवडणूक लढवली, पण मोदींच्या वादळामुळे त्या जिंकू शकल्या नाहीत. 2019 मध्ये त्यांनी पुन्हा अपक्ष म्हणून निवडणूक लढवली. यावेळी राष्ट्रवादी काॅंग्रेस, काँग्रेसने बाहेरून पाठिंबा दिल्याने त्या विजयी झाल्या.

सामूहिक विवाह कार्यक्रमात केला विवाह –
नवनीत आणि रवी यांचा विवाह सामूहिक विवाह सोहळ्यात झाला. या विवाह सोहळ्यात 3200 जोडप्यांनी एकत्र विवाह केला. एखाद्या अभिनेत्रीने सामूहिक विवाह सोहळ्यात विवाह करण्याची ही पहिलीच वेळ होती. यावेळी तत्कालीन मुख्यमंत्री पृथ्वीराज चव्हाण, उद्योगमंत्री नारायण राणे, स्वामी रामदेव बाबा, सहारा समूहाचे अध्यक्ष सुब्रतो राय, अभिनेते विवेक आणि सुरेश ओबेरॉय हे दोघेही उपस्थित होते. नवनीत आणि रवी राणा यांना एक मुलगी आणि एक मुलगा आहे.

नवनीत राणा यांच्या जातीवरून वाद झालेला आहे. शिवसेनेचे माजी खासदार आनंदराव अडसूळ यांनी नवनीत राणा यांच्यावर बनावट जात प्रमाणपत्र बनवून लोकसभा निवडणूक लढवल्याचा आरोप केला होता. मुंबई उच्च न्यायालयात याचिका दाखल करण्यात आली होती. त्यांचे जात प्रमाणपत्र मुंबई उच्च न्यायालयाने जून 2021 मध्ये रद्द केले होते. नवनीत कौर राणा यांनी बनावट कागदपत्रे वापरून हे जात प्रमाणपत्र मिळवले होते, असे न्यायालयाने म्हटले होते. त्यांना दोन लाखांचा दंडही ठोठावण्यात आला आहे. मात्र, त्यानंतर हे प्रकरण सर्वोच्च न्यायालयात पोहोचले आणि न्यायालयाने उच्च न्यायालयाच्या निर्णयाला स्थगिती दिली.

नवनीत यांनी फिल्मी कारकीर्द –
नवनीत यांनी ‘दर्शन’ या कन्नड चित्रपटातून चित्रपट सृष्टीत पदार्पण केले. यानंतर त्यांनी सीनू, वासंती आणि लक्ष्मी या तेलगू चित्रपटांमध्येही काम केले. त्यांनी 2005 मध्ये चेतना, जगपथी, गुड बॉय आणि 2008 मध्ये भूमा या तेलगू चित्रपटांमध्ये अभिनेत्री म्हणून काम केले. तिने ‘हम्मा-हम्मा’ या रिअॅलिटी शोमध्ये स्पर्धक म्हणून भाग घेतला आहे. ‘लव्ह इन सिंगापूर’ या मल्याळम चित्रपटाशिवाय नवनीत यांनी पंजाबी चित्रपट ‘लड गये पेंच’मध्येही काम केले आहे.

नवनीत यांनी 2019 च्या लोकसभा निवडणुकीसाठी प्रतिज्ञापत्र दिले होते. त्यानुसार त्यांच्याकडे सुमारे 12 कोटींची संपत्ती आहे.