कोयनानगर –  महाबळेश्वर येथे २ ते ४ मे दरम्यान आयोजित पर्यटन महोत्सवाला राज्यपाल सी. पी. राधाकृष्णन ३ मे रोजी उपस्थित राहणार आहेत. पर्यटन मंत्री शंभूराज देसाई यांनी राजभवनात राज्यपालांची भेट घेऊन त्यांना या महोत्सवाचे निमंत्रण दिले. महाराष्ट्र पर्यटन विकास महामंडळ (एमटीडीसी) आणि जिल्हा प्रशासनाच्या संयुक्त विद्यमाने हा महोत्सव साजरा होणार आहे.

या महोत्सवाचे उद्घाटन २ मे रोजी मुख्यमंत्री देवेंद्र फडणवीस यांच्या हस्ते होईल, तर उपमुख्यमंत्री एकनाथ शिंदे आणि अजित पवार यांची विशेष उपस्थिती राहणार आहे. हा महोत्सव महाराष्ट्राच्या पर्यटन क्षेत्राला नवी उभारी देणारा ठरेल, असा विश्वास व्यक्त होत आहे. या सोहळ्यासाठी सर्वांना उपस्थित राहण्याचे आवाहन करण्यात आले आहे.

यावेळी पर्यटन मंत्री शंभूराज देसाई यांनी राज्यपालांना ‘दौलत: दौलतराव श्रीपतराव देसाई’ हे चरित्र पुस्तक भेट दिले. राज्यपालांनी लोकनेते बाळासाहेब देसाई यांच्या कार्याचे कौतुक करताना म्हटले की, त्यांचे योगदान आजच्या पिढीला प्रेरणा देणारे आहे.