मुंबई- विधानसभा अध्यक्षपदाच्या निवडणुकीला परवानगी द्यावी म्हणून उपमुख्यमंत्री अजित पवार आणि सार्वजनिक बांधकाममंत्री अशोक चव्हाण यांनी राज्यपाल भगतसिंह कोश्‍यारी यांची सोमवारी भेट घेऊन त्यांना पुन्हा विनंती केली. राज्यपालांच्या भूमिकेवरच बुधवारच्या निवडणुकीचे भवितव्य ठरणार आहे.

विधानसभा अध्यक्षपदाकरिता महाविकास आघाडी सरकारने बुधवारचा दिवस निश्‍चित केला आहे. तशी शिफारस मंत्रिमंडळाने राज्यपालांना केली होती. विधानसभा नियमानुसार अध्यक्षपदाच्या निवडणुकीची तारीख राज्यपाल निश्‍चित करतात. या तरतुदीनुसारच राज्यपालांनी निवडणुकीची वेळ निश्‍चित करावी म्हणून सत्ताधाऱ्यांचा पाठपुरावा सुरू आहे.

गेल्या आठवडयात तिन्ही पक्षांच्या मंत्र्यांनी राज्यपालांची भेट घेतली होती. आता पुन्हा अजित पवार व अशोक चव्हाण यांनी राज्यपालांची भेट घेऊन निवडणुकीला मान्यता द्यावी अशी विनंती केली. या भेटीच्या वेळी राज्यपाल कोश्‍यारी यांनी गेल्या दोन दिवसांत शरद पवार आणि अजित पवार यांनी राज्यपालांबद्दल केलेल्या विधानांबद्दल नापसंती व्यक्त केली.

तसेच सरकारच्या भूमिकेबाबतही विचारणा केल्याचे समजते. तसेच अध्यक्षपदाच्या निवडणुकीबाबत काहीच ठोस आश्वासन दिले नाही. अध्यक्षपदाकरिता गुप्तऐवजी खुल्या पद्धतीने मतदान घेण्याच्या नियमातील बदलास राज्यपालांनी आक्षेप घेतला होता. हिवाळी अधिवेशनात याबाबत कायदेतज्त्रांचे मत मागविले होते.