पुणेः शहरात गुइलेन बॅरी सिंड्रोम म्हणजेच जीबीएस या आजाराची रुग्णसंख्या वाढत आहे. यामुळे शहरात भीतीचे वातावरण निर्माण झाले आहे. या आजाराचे रुग्ण सिंहगड रोड परिसरात सर्वाधिक आढळून आल्याचे महापालिकेच्या आरोग्य विभागातून सांगण्यात आले आहे. मात्र, एकीकडे या आजाराबाबत चिंता आणि भीती नागरिकांमध्ये असताना एक सुखावणारी बातमी समोर आली आहे. जीबीएस या आजारावर मात करुन ससून रुग्णालयातील पाच रुग्णांना आज सकाळी डिस्चार्ज देण्यात आला आहे. या बातमीमुळे रुग्णांचे मनोबल वाढू शकणार आहे.

पुण्यात गेल्या काही दिवसांपासून जीबीएस आजाराचे रुग्ण आढळून येत आहेत. आतापर्यंत या आजाराचे १४० रुग्ण आढळून आले आहेत. तर तीन रुग्णांचा या आजारामुळे मृत्यू झाला आहे. पुण्यातील ससून रुग्णालय येथे जीबीएस आजाराच्या डिस्चार्ज देण्यात आलेल्या पाच रुग्णांवर उपचार सुरू होते. त्यांना आज सकाळी एकत्रित डिस्चार्ज देण्यात आला. यावेळी या रुग्णांना फुलांचा पुष्पगुच्छ देत पेढे भरवत डिस्चार्ज देण्यात आला. यावेळी या रुग्णांच्या चेहऱ्यावर स्मितहास्य पाहायला मिळाले. जीबीएस या आजारावर २८ रुग्ण ससून सर्वेाचार रुग्णालयात उपचार घेत आहेत. आज डिस्चार्ज मिळालेल्या पाच रुग्णांना रुग्णालयाचे अधिष्ठाता डॅा. एकनाथ पवार यांच्या हस्ते पुष्पगुच्छ देण्यात आला.

पिंपरीतील सहा वर्षांची मुलाची जीबीएसवर यशस्वी मात

या आजाराची लागण एका सहा वर्षांच्या मुलाला झाली होती. त्यानंतर त्याला एका खाजगी रुग्णालयात उपचारासाठी दाखल करण्यात आले होते. काही दिवसांच्या उपचारानंतर या मुलाला डिस्चार्ज देण्यात आला आहे. सुरुवातीला त्याचे पाय दुखत होते. त्यानंतर आम्ही त्याला आमच्या डॅाक्टरांकडे नेले. हा त्रास आणखीनच वाढत गेला. त्यानंतर डॅाक्टरांनी रक्त तपासणी करण्यास सांगितली. त्या तपासाणीच्या अहवालात त्याला जीबीएसची लागण झाल्याचे निष्पन्न झाले. तातडीने त्याला आम्ही रुग्णालयात उपचारासाठी दाखल केले. आता तो बरा असल्याचे या मुलाच्या आईने सांगितले.