नवी दिल्ली – अमेरिका – चीन या बलाढ्य अर्थव्यवस्थातील व्यापार युद्ध चिघळत चालले आहे. अशा परिस्थितीत जागतिक पातळीवर सुरक्षित गुंतवणूक म्हणून डॉलरऐवजी सोन्याचे आकर्षण वाढले आहे. यामुळे सोन्याचा दर 1 जानेवारीपासून एकतर्फी वाढून नव्या विक्रमी पातळीवर गेला. दिल्ली सराफात सोन्याचा दर बुधवारी 1,650 रुपयांनी वाढून 98,100 रुपये प्रति दहा ग्रॅम या नव्या विक्रमी पातळीवर गेला. चांदीचा दरही 1,900 रुपयांनी वाढून 99,100 रुपये प्रति किलो या पातळीवर गेला. व्यापार युद्ध निवळत नाही तोपर्यंत या दोन धातूच्या दरात वाढ होत राहण्याची शक्यता आहे. त्यातच डॉलर कमकुवत होत असल्यामुळे डॉलरकेंद्री उत्पादनातील गुंतवणूक कमी होत आहे. याचा फटका अमेरिकेच्या कर्जरोख्यांना बसत आहे. एक जानेवारीपासून सोन्याचा दर आतापर्यंत 18,710 रुपयांनी म्हणजे 23.56 टक्क्यांनी वाढला आहे. एक जानेवारी रोजी सोन्याचा भाव 79,310 रुपये प्रति दहा ग्रॅम होता. सोने उच्च पातळीवर गेल्यामुळे आता गुंतवणूक म्हणून चांदीची खरेदी वाढत आहे. अशा परिस्थितीत चांदीचे दरही वाढत राहण्याची शक्यता व्यक्त करण्यात येते. एलकेपी सिक्युरिटी ज्या संस्थेचे विश्लेषक जतिन त्रिवेदी यांनी सांगितले की, देशातील आणि परदेशी वायदे बाजारात सोने आणि चांदीचे दर वाढत असल्यामुळे लघु ते मध्यम पल्ल्यात या दोन धातूचे दर उच्च पातळीवर राहण्याची शक्यता आहे. भारतीय वायदे बाजारात सोन्याचा दर 2.12 टक्क्यांनी वाढून 95,435 रुपये प्रति दहा ग्रॅम आणि जागतिक वायदे बाजारात सोन्याचा दर वाढून 3,318 डॉलर प्रति औस या पातळीवर गेला आहे. अमेरिकेने चिनी वस्तूवर 245 टक्के आयात शुल्क लावण्याची घोषणा केली तर चीनने अमेरिकेतून बोईंग विकत घेणार नसल्याचे स्पष्ट केले. त्याचबरोबर दुर्मिळ खनिजाची निर्यात चीन अमेरिकेला करणार नाही. चीनने अमेरिकेला जशास तसे उत्तर दिल्यामुळे अमेरिकेचे अध्यक्ष डोनाल्ड ट्रम्प खवळले असून या दोन देशात व्यापार युद्ध वाढत जाणार असल्याचे दिसून येते. अशा परिस्थितीत अमेरिकन वित्तीय साधनाऐवजी सोन्यात गुंतवणूक करणे गुंतवणूकदार पसंत करीत आहेत.
