Gold Fraud Pune – हडपसर परिसरात सोन्याच्या कर्जाच्या आमिषाने एका महिलेची तब्बल २८ लाख ५० हजार रुपयांची फसवणूक केल्याचा धक्कादायक प्रकार उघडकीस आला आहे. याप्रकरणी हडपसर पोलीस ठाण्यात गुन्हा दाखल करण्यात आला असून आरोपी सध्या फरार आहे. पोलिसांनी दिलेल्या माहितीनुसार, आयेशा मशीद परिसरात राहणाऱ्या फिर्यादी महिलेने वैद्यकीय अडचणीमुळे आर्थिक गरज भागवण्यासाठी जून २०२५ मध्ये २१ तोळे सोने मॅग फायनान्स येथे गहाण ठेवून सुमारे ११ लाख ५१ हजारांचे कर्ज घेतले होते. दरम्यान, अतिरिक्त कर्जाची गरज भासल्याने संबंधित फायनान्स कंपनीतील कर्मचारीने मोहसीन मंजूर आलम पठाण नावाच्या व्यक्तीचा संपर्क दिला. सदर आरोपीने कमी व्याजदरात अधिक कर्ज मिळवून देण्याचे आमिष दाखवत फिर्यादीचा विश्वास संपादन केला. २९ सप्टेंबर २०२५ रोजी आरोपीने फिर्यादीला घोरपडी येथील बँक ऑफ महाराष्ट्र शाखेत बोलावून घेतले. तेथे त्याच्या साथीदाराच्या खात्यातून फिर्यादीच्या खात्यावर १३ लाख ७२ हजार रुपये जमा करण्यात आले. यानंतर फिर्यादीने आधीचे कर्ज फेडून मॅग फायनान्सकडील २१ तोळे सोने परत घेतले आणि तेच सोने आरोपी मोहसीन पठाण याच्याकडे दिले. आरोपीने ते सोने त्याच्या ‘ईश्वरकृपा मल्टीपर्पज निधी लिमिटेड’ या संस्थेत तारण ठेवले असल्याचे भासवले. मात्र, काही दिवसांनी संबंधित संस्थेचा पत्ता बनावट असल्याचे समोर आले. तसेच आरोपीने फिर्यादीचे फोन घेणे बंद केले. वारंवार पाठपुरावा करूनही सोने परत न मिळाल्याने अखेर फिर्यादीने पोलिसांकडे धाव घेतली. या प्रकरणात आरोपी मोहसीन पठाण याने १९०.१७ ग्रॅम वजनाचे सुमारे २८ लाख ५० हजाराचे रुपये किमतीचे सोन्याचे दागिने अपहार करून विश्वासघात केल्याचे समोर आले आहे. हडपसर पोलीस ठाण्यात गुन्हा दाखल करण्यात आला असून, पोलीस उपनिरीक्षक राघवेंद्र सलगर हे पुढील तपास करीत आहेत. आरोपीचा शोध सुरू आहे.
