Pune Water Supply – शहराला पाणीपुरवठा करणाऱ्या धरणांनी तळ गाठल्याने महापालिकडून १५ जूनपासून दिवसाआड पाणी दिले जात आहे. मात्र, हे नियोजन करताना महापालिकेच्या जलवाहिन्यांंमध्ये हवेची पोकळी निर्माण होत असल्याने दुसऱ्या दिवशी शहराच्या अनेक भागात कमी दाबाने पाणी जात आहे. त्यामुळे महापालिकेचे पाणीपुरवठ्याचे नियोजन कोलमडले आहे. या समस्येवर तोडगा काढायचा असल्यास शहरातील पाणीपुरवठ्याचे स्वतंत्र झोन असणे आवश्यक आहे.

मात्र, भविष्यातील पाणी नियोजनासाठी अशा प्रकारचे झोनचा समावेश असलेल्या समान पाणी योजनेचे काम रखडल्याने त्याचा फटका पुणेकरांना सहन करावा लागत आहे. समान पाणी योजनेत पाणीपुरवठा विभागाने १४१ झोनपैकी केवळ ५० झोनचे काम पूर्ण झाले आहे. मात्र, त्या भागातही टाक्यांची, तसेच पाणी मीटर बसविण्याची कामे अर्धवटच असल्याने प्रशासनास पुरेशा दाबाने पाणी देणे शक्य होत नसल्याने कोट्यवधी रुपये खर्चून उभारण्यात येत असलेल्या या प्रकल्पाच्या परिणामकारकतेबाबत प्रश्न उपस्थित होत आहेत.

या योजनेनुसार प्रत्येक नागरिकाला प्रतिदिन १३५ लिटर पाणी उपलब्ध करून देण्याचे उद्दिष्ट आहे. प्रशासनाच्या माहितीनुसार काही भागांतील प्रतिमाणसी पाणीपुरवठा ३५ ते ४० लिटरवरून १०० ते १५० लिटरपर्यंत वाढला आहे. मात्र, काही ठराविक भागातच ही स्थिती असून, ज्या ठिकाणी झोनचे नियोजन नाही त्या ठिकाणी प्रशासनास पाणीपुरवठ्यात अडचणी येत आहेत.

समान पाणीपुरवठा योजनेचे काम २०२३ पर्यंत पूर्ण होणे अपेक्षित होते. मात्र, कोविड काळातील विलंब, विविध विभागांच्या परवानग्या, रेल्वे आणि राष्ट्रीय महामार्ग प्राधिकरणाशी संबंधित अडचणी, तसेच ठेकेदारांकडून झालेल्या विलंबामुळे प्रकल्प रखडला. उर्वरित काम पुढील पाच ते सहा महिन्यांत पूर्ण करण्याचा दावा प्रशासनाने केला आहे.

अवघ्या ५० झोनचे काम पूर्ण
महापालिकेने जुन्या पाणीपुरवठा व्यवस्थेची पुनर्रचना करत समान पाणी योजनेत शहराची १४१ झोनमध्ये विभागणी केली आहे. मात्र, आता पर्यंत केवळ ५० झोनचे काम पूर्ण झाले आहे. प्रत्येक झोनसाठी स्वतंत्र पाण्याची टाकी, जलवाहिन्या आणि मीटर प्रणाली उभारण्यात येत आहे. मात्र, बाणेर-बालेवाडी, पाषाण, सूस, वारजे, महंमदवाडी, कोंढवा-महंमदवाडी आणि सिंहगड रस्ता परिसरातील काही झोनचे काम पूर्ण झाल्यानंतरही नागरिकांकडून पाणीपुरवठ्याचा दाब, वेळा आणि उपलब्धतेबाबत तक्रारी केल्या जात आहेत.