पणजी- गोव्यातील मनोहर आंतरराष्ट्रीय विमानतळावरील कर्मचाऱ्याने शनिवारी (29 जुलै) सायंकाळी विमानतळावर बॉम्ब असल्याची माहिती दिली होती. याची माहिती मिळताच पोलिसांनी तात्काळ अलर्ट जारी केला. नंतर कळले की, कर्मचाऱ्याने मद्यधुंद अवस्थेत फोन केला होता. आता आरोपी कर्मचाऱ्याला अटक करण्यात आली आहे.

उत्तर गोवा जिल्ह्याचे एसपी निधिन व्हॅल्सन यांनी सांगितले की, पोलिस नियंत्रण कक्षाजवळ दुपारी 4:45 वाजता एक कॉल आला आणि विमानतळावर बॉम्ब असल्याचे सांगण्यात कॉल डिस्कनेक्‍ट करण्यात आला.

विमानतळ किनारपट्टीच्या राज्यात असल्याने माहिती गांभीर्याने घेण्यात आली. मोपाच्या मनोहर आंतरराष्ट्रीय विमानतळ आणि दाबोलीम विमानतळावर नियंत्रण कक्षाला सतर्क करण्यात आले. विमानतळावर बॉम्ब असल्याची माहिती खोटी असल्याचे नंतर समजले.

तपास अधिकाऱ्याने सांगितले की, चुकीची माहिती देणाऱ्या कर्मचाऱ्याची झडती घेतली असता असे आढळून आले की, त्या कर्मचाऱ्याचे नाव कुंदन कुमार असून तो मनोहर आंतरराष्ट्रीय विमानतळावर काम करतो. आरोपी कुंदन याला अटक करण्यात आली आहे.

आरोपीने चौकशीदरम्यान सांगितले की, तो बिहारचा रहिवासी असून त्याने दारूच्या नशेत खोटा फोन केला होता. आरोपींविरुद्ध आयपीसीच्या विविध कलमान्वये धमकावणे आणि जनतेत भीती निर्माण केल्याप्रकरणी एफआयआर दाखल करण्यात आला आहे.