Girlfriend Kidnapped Boyfriend – तीन वर्षांपासून प्रेमसंबंध असलेल्या तरुणाने लग्नास नकार दिल्याच्या रागातून प्रेयसीनेच प्रियकराचे अपहरण केल्याची धक्कादायक घटना समोर आली आहे. लोणीकंद पोलिसांनी बीड, नांदेड आणि परभणी पोलिसांच्या मदतीने अवघ्या चार तासांत अपहृत तरुणाची माजलगाव येथून सुखरूप सुटका केली. या प्रकरणी प्रेयसीसह सात जणांना अटक करण्यात आली असून, एका विधीसंघर्षित मुलालाही ताब्यात घेण्यात आले आहे.

अपहृत तरुणाचे नाव निलेश लक्ष्मण बोद्रे (वय २९, रा. शिंदेवाडी, ता. हवेली) असे आहे. अटक करण्यात आलेल्यांमध्ये सोनाली बालाजी निर्वाळ (वय २७), सुदाम मानिक ताठे (वय २३), शेख सोहेल शेख अफसर (वय २१), देवीदास भगवान पांजगे (वय २१), वैभव मिलिंद शेळके (वय २२), सारंग भगवानराव काकडे (वय ३३) आणि प्रसाद बंडू गवळी (वय २७, सर्व रा. परभणी जिल्हा) यांचा समावेश आहे.

न्यायालयाने सर्व आरोपींना ३० मेपर्यंत पोलिस कोठडी सुनावली आहे. पोलिसांनी दिलेल्या माहितीनुसार, बुधवारी (दि. २७) रात्री साडेनऊच्या सुमारास अजय बोद्रे यांनी नियंत्रण कक्षाला फोन करून त्यांच्या भावाचे एच.पी. पेट्रोल पंपाजवळील शिवनेरी मिसळसमोरून काही जणांनी मोटारीतून अपहरण केल्याची माहिती दिली. घटनेची माहिती मिळताच लोणीकंद पोलिसांनी तातडीने घटनास्थळी धाव घेतली.

प्रकरणाचे गांभीर्य लक्षात घेऊन गुन्हा दाखल करण्यात आला आणि आरोपींचा शोध सुरू करण्यात आला. पोलिस आयुक्त अमितेश कुमार स्वतः या तपासावर लक्ष ठेवून होते. गुन्हे शाखा आणि स्थानिक पोलिसांची पाच पथके आरोपींच्या मागावर होती. तांत्रिक तपासादरम्यान आरोपी अपहृत तरुणाला बीड जिल्ह्याकडे घेऊन गेल्याची माहिती पोलिसांना मिळाली. त्यानुसार बीड, नांदेड आणि परभणी पोलिसांच्या मदतीने निलेश बोद्रे याची माजलगाव येथून सुखरूप सुटका करण्यात आली.