नाशिकः मालेगाव येथील अजंग गावी झालेल्या कार्यक्रमात केंद्रीय गृहमंत्री अमित शहा आणि राष्ट्रवादीचे जेष्ठ नेते छगन भुजबळ शेजारी-शेजारी बसलेले होते. या कार्यक्रमावेळी शाह यांनी भुजबळ यांना स्वतःहून आपल्या जवळची खुर्चे दिली. यावेळी या दोन नेत्यांमध्ये झालेल्या गुफ्तगूचा तपशील जरी मिळाला नसला तरी भुजबळ भाजपमध्ये जाणार असल्याच्या चर्चांणा उधाण आले आहे. शाह यांनी त्यांच्या शेजारीच खुर्ची भुजबळांना बसायला दिल्याचा प्रश्न मंत्री गिरीष महाजन यांना विचारण्यात आला. या प्रश्नावर त्यांनी खुर्ची दिली त्यात गैर काय असे उत्तर दिले आहे.

गिरीष महाजन काय म्हणाले?

“मालेगावमधील कार्यक्रम भारतीय जनता पार्टीचा नव्हता, तो शासकीय कार्यक्रम होता. त्यामुळे तिथे सर्वच पक्षांचे लोक होते”, असे गिरीश महाजन म्हणाले आहेत. तसेच त्या कार्यक्रमात अमित शाह यांनी छगन भुजबळ यांना खुर्ची दिली असेल तर त्यात गैर काहीच नसल्याची प्रतिक्रिया दिली आहे. तो भारतीय जनता पार्टीचा कार्यक्रम नव्हता. तो एक शासकीय कार्यक्रम होता. त्यामुळे तिथे सर्वच मंत्र्यांना व आमदारांना कार्यक्रमाचे निमंत्रण देण्यात आले होते. माझ्या माहितीप्रमाणे १४ मंत्र्यांना या कार्यक्रमाचे निमंत्रण देण्यात आले होते.

खुर्ची देणं यात गैर काय 

छगन भुजबळ हे ज्येष्ठ नेते आहेत, हे वरिष्ठ नेते अनेक वर्षे मंत्री देखील राहिलेले आहेत. सहाजिकच त्यांना खुर्ची देण्यात गैर काहीच नाही. तुम्ही वारंवार भुजबळांबाबत प्रश्न विचारत आहात, मात्र मी त्यावर काही बोलू शकत नसल्याचे देखील महाजन यावेळी बोलताना म्हणाले. त्याबाबत वरिष्ठ नेते चर्चा करतील. भुजबळ आमच्या वरिष्ठांशी बोलतील. देवेंद्र फडणवीस किंवा इतर नेत्यांशी बोलतील, असे देखील ते म्हणाले.

नेमकं काय घडल होतं?

२४ जानेवारीला केंद्रीय गृहमंत्री नाशिकच्या दौऱ्यावर होते. त्यांच्या हस्ते शेतकऱ्यांसाठीच्या माती परीक्षण केंद्र व अगरबत्ती कारखान्याचे उद्घाटन करण्यात आले. सहकार परिषदेच्या माध्यमातून त्यांनी शेतकऱ्यांशी संवाद साधला. या कार्यक्रमास भुजबळदेखील उपस्थित होते. या कार्यक्रमाच्या मंचावर अमित शाह दाखल होताच त्यांनी भुजबळांकडे बघितले. भुजबळ यांना बोलवत आपल्या जवळच्या खुर्चीवर बसवले. यावेळी दोन्ही नेत्यांमध्ये काही वेळ संवाद देखील झाला. या गुफ्तगूमुळे भुजबळ भाजपमध्ये जाणार असल्याच्या चर्चांना उधाण प्राप्त झाले आहे.